amérika, yawropa ittipaqi we yaponiye birma herbiy hökümitini eyiblidi
amérika, yawropa ittipaqi we yaponiye rehberliri bayanat élan qilip, birmada namayishchilarning étip öltürülüshige naraziliq bildürdi.
türkiye awazi radiyosi xewiri: yawropa ittipaqi tashqi munasiwetler we xewpsizlik siyasiti aliy wekili josip borrél birmada puqralarning ölümige seweb bolghanlarning hésab bérishi kéreklikini tekitlep: «bu tiragédiye axirlishishi lazim» dédi.
amérika pirézidénti jo baydin birmada herbiy özgirishke qarshi namayishchilarning xewpsizlik küchliri teripidin öltürülüshige naraziliq bildürdi we herbiy özgirish qozghighuchilargha qarshi yéngi émbargo yürgüzüsh pilani tüzüwatqanliqlirini bildürdi.
yaponiye birmada 1-féwral (2021) yüz bergen herbiy özgirishtin kéyin qozghalghan tinchliq namayishlirida, birma saqchi-eskerlirining puqralarni basturghanliqini qattiq eyiblidi.
yaponiye tashqi ishlar weziri motégi toshimitsu: «tinchliq bilen ötküzülgen namayishlargha rast oq ishlitilgenlikini qobul qilghili bolmaydu. birma armiyesi xelqning hayatini sirtqi xeterlerdin qoghdaydighan teshkilat ikenlikini este tutushi kérek.
yaponiye hökümiti puqralargha yürgüzülüwatqan zorawanliqlarning derhal toxtitilishini, döletning emeliy rehbiri we tashqi ishlar ministiri ang san suchining qoyup bérilishini we birma démokratiyesining derhal eslige keltürülüshini chaqiriq qilidu» dédi.
