amérika kubani qaytidin «térrorluqqa yardem bergen döletler» tizimlikige kirgüzdi
tramp hökümiti hakimiyetni ötküzüp bérishke bir hepte qalghanda,sabiq pirézidént obama dewride yolgha qoyulghan munasiwetlerni normallashturush siyasiti netijiside«térrorluqqa yardem bergen döletler tizimliki»din chiqiriwétilgen kubagha qarshi bir qedem tashlidi.
türkiye awazi radiyosi xewiri: amérika tashqi ishlar ministiri mayk pompéyo kubaning «térrorluqqa yardem bergen döletler» tizimlikige kirgüzülgenliki toghrisida yazma bayanat élan qildi.
bayanatta: «tashqi ishlar ministirliqi térroristlargha panahlinish imkaniyiti yaritip, xelqaraliq térrorluq heriketlerge yardem qilghanliqi üchün, kubani térrorluqqa yardem bergen dölet dep békitti» déyildi.
u tramp hökümitining bashtin tartip kubaning xelqqe qarshi qilghan muamilisige we wénézuéla qatarliq döletlerning amérika qitesidiki paaliyetlirige qarita qedem tashlap kelgenlikini bildürüp: «bu qedem bilen, kuba hökümitidin yene bir qétim hésab soraymiz we ulargha nahayiti éniq halda mundaq signal bérimiz: kastro hakimiyiti xelqaraliq térrorizmgha qiliwatqan yardimini toxtitishi we amérika adalitige ziyan yetküzüshtin waz kéchishi kérek» dédi.
kubaning onlarche yillardin buyan amérikani öz ichige alghan nurghun döletlerning sotidin qachqan jinayetchilerni qoynigha alghanliqini ilgiri sürüp: «bügünki békitish, kuba bilen mueyyen sahelerde soda qilghan döletlerge we kishilerge qarshi jaza yürgüzüsh arqiliq kubani émbargogha duchar qilidu. amérikaning kubagha qarshi tashqi yardemlerge qoyghan cheklimisi, kuba we munasiwetlik dölet hemde teshkilatlarning, mudapie mehsulatlirini éksport qilishni we sétip bérishni chekleydu. köp qollinishchanliqqa ige mehsulatlargha bezi éksport cheklimilirini qoyidu» dédi.
sabiq pirézidént barak obama 2015-yili 29-may kubani térrorluqqa yardem bergen döletler tizimlikidin chiqiriwetken idi.
ötkenki heptilerde sudan chiqiriwétilgen térrorluqqa yardem bergen döletler tizimlikidin, iran, kuba, shimaliy koréye we süriye qatarliq döletler orun aldi.
