amérika iran bilen qoral sodisi qilidighan shexs we organlargha émbargo yürgüzüshke teyyar

türkiye awazi radiyosi xewiri: birleshken döletler teshkilati (b d t) irangha qaritilghan qoral émbargosini bikar qilghanliqini jakarlighandin kéyin, amérika tashqi ishlar ministiri mayk pompéyo yazma bayanat élan qildi.

pompéyo 19-séntebir tashlighan qedemliri bilen irangha qaritilghan qoral émbargosinimu öz ichige alghan b d t ning barliq émbargolirini qaytidin yolgha qoyidighanliqini éytti.

pompéyo irangha bir qisim eneniwi qorallarni éksport qilish yaki bu dölettin qoral sétiwélish b d t xewsizlik kéngishining qararlirigha xilapliq qilghanliq bolidighanliqini tekitlep, «amérika irangha muntizim qorallarni sétish yaki yötkeshke heisse qoshqan shexs we organlargha émbargo yügüzüsh üchün dölet ichidiki barliq küchlirini ishlitishke teyyar. shundaqla bu qorallargha munasiwetlik téxnika jehettin terbiyilesh, iqtisadiy yardem we mulazimet yaki bashqa her qandaq xildiki yardem bilen teminleydighan kishi we organlarghimu émbargo yürgüzüshke tayyarmiz. ottura sherqte tinchliq we muqimliqni xalaydighan hemde térorluqqa qarshi küreshni qollaydighan barliq döletler iran bilen bolghan barliq qoral-yaragh tijaritidin yiraq turushi kérek» dédi.

pompéyo irangha qoral sétip bérishning rayondiki jiddiychilikni kücheytiwetkenlikini ilgiri sürüp, térrorluq guruppilirining qoligha téximu köp qoral bergenlikini we israiliye bilen bashqa tinch döletlerning bixeterlikige xewp yetküzgenlikini éytti hemde «ötken 10 yildin buyan her qaysi döletler b d t ning her xil tedbirliri astida irangha qoral sétishtin saqlandi. emdilikte bu cheklimilerge qarshi chiqqan bir dölet tinchliq we bixeterlikning ornigha toqunush we jiddiychilikni kücheytishni tallighan bolidu» dédi.

pompéyo irangha hazir ikki xil tallashning barliqini tekitlep, iranning ya b d t ning émbargolirigha xilapliq qilip, qoral sétiwilishni dawamlashturishi yaki fondlarni iran xelqi üchün ishltishni tallishi kéreklikini bildürdi.