engliye parlaménti bash wezir jonsonni soraqqa tartti

türkiye awazi radiyosi xewiri: engliye parlaméntining awam palatasi bash wezir boris jonsondin jorj floydning ölümi toghrisida soallar soridi.

engliye ishchi partiyesining rehbiri kéyir starmér (Keir Starmer) floydning ölümidin chöchigenlikini bildürüp: «bu jinayet, amérika we bashqa döletlerdiki irqiy ayrimichiliqning yolini échip béridu» dédi.

u bash wezir boris jonsonning mezkur mesilige qarita bir nerse démigenlikining, özini intayin heyran qaldurghanliqini eskertip: «boris jonsonning amérika pirézidénti donald tramp bilen kéyinki qétim sözleshkende, trampning weqelerge tutqan pozitsiyesidin engliyening yirgengenlikini bildürüshini ümid qilimen» dédi.

bash wezir boris jonson yuqiridiki eyibleshlerge qarita, floydning öltürülüshining kishini chöchitidighanliqini we qobul qilghili bolmaydighanliqini, biraq xelqning tinchliq usulda namayish qilishi kéreklikini bildürdi.

shotlandiye dölet partiyesining engliye parlaméntidiki guruppisining rehbiri iyan blekford (Ian Blackford), bash wezir boris jonsonni hazirghiche mezkur mesilidin özini qachurushqa urunush bilen eyiblep, amérika pirézidénti tramp bilen körüshkende, néme deydighanliqini we «qara tenliklerning hayatimu qimmetlik» dep deydighan-démeydighanliqini soridi.

bash wezir bu soalgha: «elbette, qara tenliklerning hayatimu qimmetlik. peqet amérikadikila emes, belki dunyadiki we bizning dölitimizdiki ghezep-nepretni, qayghuni pütünley chüshinimen» dep jawab berdi.

bash wezir boris jonson namayish qilish hoquqini qollaydighanliqini, biraq namayishlarning qanun we ijtimaiy musape qaidelirige boysunghan halda qilinishi kéreklikini eskertti.