italiyede wuxen wirusi ölümi xitaydin éship ketti

türkiye awazi radiyosi xewiri: italiyede 2020-yili 21-féwralda körülgen wuxen wirusigha munasiwetlik weqeler örlep 41 ming 35 ke yetti. dawalinip yaxshilanghanlarning sani yéngi tughulghan bir bowaqni qoshqanda 4 ming 440 qa yetti.

italiye yerlik metbuatliri depne xizmetlirining yétishmigenlikini, nurghun méyitlarning chérkawlarda turuwatqanliqini xewer qildi.

ispaniye sehiye ministirliqi wuxen wirusi sewebidin jénidin ayrilghanlar sanining 1002 ge yetkenlikini, 19 ming 980 kishining yuqumlanghanliqini élan qildi.

firansiyede wuxen wirusi bilen jénidin ayrilghanlar sani 108 kishi éship 372 ge chiqti. yuqumlanghanlar sani 10 ming 995 ke yetti.

firansiye pirézidénti makron ichki ishlar ministirliqida söz qilghanda, zörür bolmighan ehwalda sirtqa chiqishqa chek qoyghan belgilimilerge riaye qilmighanlargha naraziliq bildürüp: «bezi kishilerning baghchilargha, su üzüsh kölcheklirige yaki bazarlargha bériwatqanliqini körüwatimen. bu kishiler bizning sözimizni chüshenmidimu?» dédi.

u yene: «téxi kirizisning béshida turuwatimiz. bu musabiqe, wirus bilen waqitni qolgha keltürüsh musabiqisi hésablinidu. biz buninggha qarshiliq körsitelishimiz lazim» dédi.

firansiyening dunyagha dangliq kan (Cannes) flim féstiwali iyun (2020) éyigha kéchiktürüldi.

firansiye taratquliridiki xewerlerde körsitilishiche, üch doxtur firansiye bash ministiri idward filippé (Edouard Philippe) bilen ötken ay wezipisidin istépa bergen sabiq sehiye ministiri angés buzin (Agnes Buzyn) üstidin erz qilghan we maskilarning yétishmeywatqanliqigha naraziliq bildürgen.

gollandiyede yéqinqi 24 saet ichide 18 kishi wirus sewebidin jénidin ayrildi we bu san 76 ge chiqti. wuxen wirusigha munasiwetlik weqe sani 2 ming 460 qa yetti.

gollandiyening sehiye, parawanliq we tenterbiye ministiri bruno bruwins (Bruno Bruins) ning wezipisidin istépa bergenliki؛ buninggha heddidin ziyade hérish-charchashning seweb körsitilgenliki bildürüldi.

bruno bruwins charshenbe (2020-yili 18-mart) küni parlaméntning töwen qanitini teshkil qilidighan awam palatasida wuxen wirusigha qarshi tedbirler muzakire qiliniwatqanda hoshidin ketken idi.   

yawropa parlaménti wuxen wirusigha qarshi yolgha qoyulidighan mexsus tedbirlerni maqullash üchün 26-mart (2020) ta toplinidu. 1-2-aprél ötküzülmekchi bolghan omumiy kéngesh yighini emeldin qalduruldi.

yawropa ittipaqi komitétining bu heqtiki bayanatida, 26-27-martta 27 döletning rehberliri toplinidighan yawropa ittipaqi rehberler yighinining kéchiktürülgenliki qeyt qilindi.

nato bash katipi stolténbérg wirus sewebidin manéwirlarning kéchiktürülgenlikini yaki emeldin qaldurulghanliqini élan qildi.

u: «körülüp baqmighan bir kirizisni bashtin kechürüwatimiz. buningdin burun nurghun kirizislardin öttuq, bu kirizistinmu ötüp kétimiz» dédi.

monako padishahliqi shahzade 2-albértningmu wuxen wirusi bilen yuqumlanghanliqini élan qildi.

engliyede wuxen wirusi sewebidin jénidin ayrilghanlarning sani 144 ke, yuqumlanghanlarning sani 3 ming 269 gha yetti. bash wezir boris jonson xelq tewsiyelerge riaye qilghan ehwalda wuxen wirusi weziyitining 12 heptide yaxshilinishi mumkinlikini éytti.

gérmaniyede wuxen wirusi bilen yuqumlanghanlarning sani 15 ming 320 ge, jénidin ayrilghanlarning sani 44ke chiqti.

shiwéytsariyede wuxen wirusi sewebidin 43 kishi jénidin ayrildi, yuqumlanghanlar 4 ming 222 ge chiqti. bélgiyede bolsa, 21 kishi jénidin ayrildi, yuqumlanghanlarning sani 1795 ke chiqti.

wuxen wirusi sewebidin 217 kishi jénidin ayrilghan, 14 ming 366 kishi yuqumlanghan amérikada, xelqara sayahet agahlandurushi 4-derijige chiqirildi. kishilerning xelqaraliq sayahet qilmasliqi, chet eldikilerning amérikagha qaytip kélishi chaqiriq qilindi.

amérikada wuxen wirusining eng éghir tesirige uchrighan kaliforniye ishtatida «öydin chiqmasliq buyruqi» élan qilindi.

amérika pirézidénti tramp 10-12-iyunda marilend ishtatida ötküzülmekchi bolghanG-7  rehberler yighinining wuxen wirusi sewebidin widéo konférans usulida ötküzülüshini qarar qildi.

jenubiy amérika qitesige jaylashqan kolombiyede wuxen wirusigha qarshi turush ramkisida, chet eldin kolombiyege kélish 30 künlük cheklendi. bu belgilime chet ellerde turuwatqan kolombiyeliklernimu öz ichige aldi.

péruda 78 yashliq bir kishi wuxen wirusi sewebidin jénidin ayrildi. argéntinada jénidin ayrilghanlarning sani üchke chiqti.

haytida tunji qétim ikki kishide wuxen wirusining bayqalghanliqi élan qilindi. hayti hökümiti «jiddiy halet» élan qilip, barliq ayrodurum, déngiz portliri, mektepler we zawutlarning taqilidighanliqini bildürdi.

dunya miqyasida wuxen wirusi sewebidin jénidin ayrilghanlarning sani 10 mingdin éship ketti.

istatistikilargha qarighanda, dunyada wuxen wirusi bilen yuqumlanghanlarning %90 ining salametliki yaxshilanghan. ölüm nisbiti %10 bolghan.