idlibtiki chédir lagéri bashqurulidighan bomba hujumigha uchridi
b d t süriyede beshshar esed hakimiyitining idlibtiki bir chédir lagérida 12 ademning ölümige seweb bolghan hujumini eyiblidi.
türkiye awazi radiyosi xewiri: b d t süriye alahide wekili pédérsén (Pedersen) ning alahide meslihetchisi najat rochdi (Najat Rochdi) ikki kün ilgiri (20-noyabir) idlibning shimaligha jaylashqan kah yézisigha jaylashqan chédir lagérigha qilinghan we 12 ademning ölümige seweb bolghan hujum toghrisida yazma bayanat élan qildi.
bayanatta, rayondin élinghan xewerlerde, bir bashqurulidighan bombining chédir lagérigha qaritip étilghanliqi we bombining tughut doxturxanisigha yéqin jaygha chüshüp partlighanliqining bildürülgenliki qeyt qilindi.
bayanatta mundaq déyildi:
«kishiler köp bolghan chédir lagérigha qilinghan bashqurulidighan bomba hujumini qattiq eyibleymiz. hujumda 12 adem jénidin ayrilghandin sirt, 50 adem yarilandi. jénidin ayrilghanlar ichide kichik balilarmu bar.»
bayanatta, lagérdikilerning makanliridin ayrilishqa mejburlanghanliqi, bezi kishilerning bir qanche qétim yurt-makanliridin ayrilghanliqi we bularning intayin qiyin sharaitta yashaydighanliqi eskertilish bilen birge, hawa témpératurasi töwenligen bundaq ehwalda hujum qilinip, chédir we bashqa panahlinish jaylirining weyran qilinghanliqi alahide tekitlendi.
bayanatta, 1989-yili 20-noyabir b d t da balilar ehdinamisining imzalanghanliqi xatirilitilip, hujumning 20-noyabir dunya balilar heq-hoquqi künide qilinghanliqining, kishini qattiq endishelendüridighanliqi qeyt qilindi.
«süriyede yüz bergen insaniy tiragédiye axirlishishi kérek» déyilgen bayanatning axirida, puqralargha we ammiwi eslihelerge qaritilghan hujumlar tekshürüshini bashlash chaqiriq qilindi.
