bangladishta 19 milyondin artuq balining kélechiki xeter astida
b d t balilar fondi (UNICEF) bangladishta kilimat özgirishige munasiwetlik tebiiy apetning 19 milyondin artuq balining hayatigha we kélechikige xeterlik tesir körsitidighanliqi toghrisida agalandurdi.
türkiye awazi radiyosi xewiri: b d t balilar fondi bangladishtiki kilimat özgirishige munasiwetlik tebiiy apetning 19 milyondin artuq balining hayati we kélechikige tesir körsitidighanliqini agahlandurghan doklat élan qildi.
doklatta körsitilishiche, kilimat özgirishige munasiwetlik su apetliri, siklon we bashqa muhit xaraktérlik apetlerning tesiri sewebidin 19 milyondin artuq balining hayati we kélechiki xeter astida iken.
doklatta, yuqiridiki sanliq melumatlargha, birmadin qéchip bangladishtiki sharaiti nachar lagérlarda turuwatqan yüz minglarche arakanliq musulman baliliriningmu kirgüzülgenliki eskertildi.
doklatta, bangladish miqyasida aililerning, déhqanchiliq étizlirining shorlishishi, su apetliri yaki éqin sulirining aziyishi sewebidin yézilardiki hayatliq menbeliridin ayrilip chong sheherlerge köchüwatqanliqi, nurghun balilarning hayatta qélish üchün kichik yashta ishleshke, öylinishke yaki her xil etkeschilikke mejburliniwatqanliqi alahide qeyt qilindi.
b d t balilar fondining dakkadiki bayanatchisi jén jekwés simon (Jean-Jacques Simon) birleshme agéntliq (AP) qa bergen bayanatida, texminen 12 milyondin artuq balining su tashqini yüz béridighan derya boyliri etrapida, 3 milyon balining qurghaqchiliqning tesirige uchrighan yéza igiliki rayonlirida yashaydighanliqini bildürdi.
doklatta bildürülishiche, sharaiti nachar lagérlarda yashawatqan texminen yérim milyondin artuq arakanliq bala we bashqa 4 yérim milyondin artuq bala siklon küchlük tesir körsitiwatqan yéza rayonlirida yashaydiken.
