béyjing washington bilen munasiwetlerni ilgiri sürüshke teyyar ikenlikini bildürdi

türkiye awazi radiyosi xewiri: xitay tashqi ishlar ministirliqi bayanatchisi lu kang yazma bayanat élan qilip, amérika qoshma ishtatliri bilen bolghan ikki terep munasiwetlirining yérim esirge yéqin musapiside hasil qilinghan ilgirileshlerning asan qolgha kelmigenlikini qeyt qildi we özgirishlerdin tejribe igilesh kéreklikini eskertip, «ikki terep bir – birining istratégiyelik niyetlirige muwapiq we biterep shekilde qarishi, istratégiyelik alaqini kücheytishi, xata perezlerning aldini élish üchün özara istratégiyelik ishenchni ilgiri sürüshi kérek» dédi.

xitayning, amérika qoshma ishtatliri bilen kordinatsiye, hemkarliq we muqimliq arqiliq kücheytilgen ikki terep munasiwetlirini téximu ilgiri sürüshke teyyar ikenlikini bildürgen lu kang, ikki dölet munasiwetlirining yéqinqi 40 yilda musheqqetlik musapilerni bésip ötüp ilgiriligenlikini we hemkarliq saheside «tarixiy utuqlarni yaratqanliqi» ni tekitlep ötti.

ikki terepning özara hemkarliqining omumiy yönilishini dawamlashturushi, ikki dölet xelqige téximu köp menpeet yaritip bérish üchün özara menpeetni tayanch qilidighan hemkarliq sahesining kéngeytilishi kéreklikige isharet qilghan lu kang, xitay bilen amérika qoshma ishtatlirining bir – birining igilik hoquq, xewpsizlik we tereqqiyatigha munasiwetlik menpeetlirige hörmet qilishi, ikki terep munasiwetlirige ziyan yetküzmeslik üchün, oxshashmaydighan nuqtilarni muwapiq shekilde hel qilish üchün küch chiqirishi lazimliqini qeyt qildi.

yéqinqi 40 yilliq özgirishlerdin kéyin xitay – amérika munasiwetlirining «yéngi bir tarixiy bashlinish nuqtisida» turuwatqanliqini eskertken lu kang, dölitining, reis shi jinping bilen amérika qoshma ishtatliri pirézidénti donald tramp 20 dölet guruhi bashliqlar yighinida chüshinish hasil qilghan nuqtilarni ijra qilishqa teyyar ikenlikini bildürdi.

washington dairilirining, 200 milyard dollarliq xitay mehsulatigha qoyghan tamozhna béji nisbitining 2019 – yili 1 – yanwardin bashlap %10 din %25 chiqirish qararini toxtitip qoyushini kapaletke ige qilidighan «urush toxtitish», tereplerning bir – birlirige yéngi tamozhna bajlirini qoyushlirining aldini alghanidi.

xitaymu buninggha qarita amérikidin import qilinghan aptomobil we aptomobil zapchaslirigha qoyghan qoshumche bajning nisbitini chüshürgenlikini uqturghanidi.