islam hemkarliq teshkilati xelqara jemiyetni pelestin xelqini qoghdashqa chaqirdi
türkiyening teklipige binaen islam hemkarliq teshkilatining tünügün istanbulda chaqirilghan aliy derijilik rehberler pewquladde yighinining bayannamiside, xelqara jemiyet pelestin xelqini qoghdashqa chaqiriq qilindi.
türkiye awazi radiyosi xewiri: islam hemkarliq teshkilati aliy derijilik rehberler pewquladde yighinidin kéyin élan qilinghan bayannamide, israiliyening pelestin térrotériyeliride yürgüzüwatqan insan qélipidin chiqqan wehshiylikliri we zulum – sitemliri sewebidin, israiliye «ishghalchi küch» dep ataldi hemde israiliyening jawabkarliqqa tartilishi tekitlendi.
israiliye küchliri teripidin sadir qilinghan jinayetler we yürgüzülgen qetliamlarning tekshürülüshi hemde israiliye dairilirining bu mesilidiki jinayi mesuliyetchanliqlirining békitilishi meqsitide mutexessislerdin teshkil tapqan xelqaraliq musteqil tekshürüsh komitéti qurulushi telep qilindi.
bu komitétning delil – ispatlirining xelqaraliq organlar we xelqaraliq teshkilatlargha yetküzülüshi üchün derhal heriketke ötüshi telep qilindi.
xelqara jemiyet pelestin xelqini qoghdash üchün rayongha xelqara tinchliq saqlash küchi ewetish yoli qatarliq xizmetlerni ishlesh üchün derhal heriketke ötüshke chaqiriq qilindi.
buningdin bashqa yene, bu mesilining derhal hem birleshken döletler teshkilati xewpsizlik kéngishide, hem birleshken döletler teshkilati omumiy kéngishide, hemde kishilik hoquq kéngishide küntertipke kirgüzülüshi telep qilindi.
birleshken döletler teshkilati xewpsizlik kéngishini öz ichige alghan pütkül xelqara jemiyet, pelestin bilen munasiwetlik xelqara qanun we xelqara tüzümni qoghdash ehdinamilirige riaye qilishqa chaqiriq qilindi.
bayannamide, israiliye ishghal küchliri teripidin sadir qilinghan we wehshiylerche jinayetlerdin teshkil tapidighan qilmishlarning, amérika qoshma ishtatlirining israiliyening birleshken döletler teshkilati xewpsizlik kéngishide hésab bérishige tosqunluq qilishi sewebidin sadir qiliniwatqanliqi tekitlendi.
bu jinayetlerning amérika qoshma ishtatlirining tél awiwdiki bash elchixanisini israiliyening ishghaliyiti astidiki quddusqa yötkesh toghruluq chiqarghan qanunsiz qararining arqa pilani dairiside sadir qiliniwatqanliqi eskertilgen bayannamide, buning, israiliyening pelesitn xelqige perwasizlarche muamile qilishida israiliye hökümitini jasaretlendürüwatqanliqi tekitlinip mundaq déyildi: «islam hemkarliq teshkilati öz teqdirini özi belgilesh we 1967 – yili 4 – iyun küni békitilgen chégra liniyeliri asas qilinghan halda, paytexti quddus bolghan musteqil we igilik hoquqluq pelestin döliti qurush heq – hoquqlirini öz ichige alghan, waz kéchilmes milliy heq – hoquqlirigha érishish tirishchanliqlirida pelestin xelqige qarita pirinsipliq yardembéridighanliqimizni yene bir qétim tekrarlaymiz, barliq eza döletlerni pelestin dölitini resmiy étirap qilishqa chaqirimiz. amérika qoshma ishtatliri pirézidénti donald trampning quddusni israiliyening atalmish paytexti dep étirap qilish nishan qilinghan qanunsiz qararini ret qilimiz.»
