xitay kommunistik partiyesining 19-qurultiyi bashlandi

türkiye awazi radiyosi xewiri: xitay kommunistik partiyesining 19-nöwetlik qurultiyi béyjingdiki tyenenmén meydanidiki xelq chong sariyida bashlandi. shi jinping qurultayning échilish murasimida: «ottura sewiyelik parawanliq jemiyet berpa qilish yolidiki muweppeqiyetler we xitayche alahidilikke ige sotsiyalizmning yéngi dewri» namliq doklatini élan qildi.

doklatta, ötken besh yilda qolgha keltürülgen muhim tereqqiyatlar we kélechekte güllengen jemiyet berpa qilishqa munasiwetlik nishan we xizmetler tilgha élindi. shi jinping xitayche alahidilikke ige sotsiyalizmning 2020- we 2050-yilliri arisida yéngi dewrge kiridighanliqini, bu mezgilde ottura we yuqiri sewiyede güllengen, küchlük hemde maslishishchan jemiyet berpa qilish bilen, xitay kommunistik partiyesining sotsiyalistik qurulmisini zamaniwilashturushning kapaletke ige qilinidighanliqini bildürdi. u: «xitay kommunistik partiyesi sheher we yézilar arisidiki perq, rayonlar arisidiki adil bolmighan kirim tengpungluqi qatarliq mesililerge yüzlinishke teyyar bolush kérek, xitayning igilik hoquqigha munasiwetlik mesililerge qarshi turush kérek. xelqimiz xizmet, maarip, sehiye, öz-zémin we yashanghanlarni béqish saheliride nurghun mesililerge duch kélidu» dédi.

u partiye ichide chiriklikke yol qoyulmaydighanliqini tekitlesh bilen birge, partiye ichide islahat élip bérilidighanliqini bildürüp, partiye ezalirini xitayning bir pütünlüki we igilik hoquqigha ziyan salidighan barliq heriketlerge qarshi turushqa chaqirdi.

shi jinping bashqa döletler bilen bolghan soda munasiwetliri üstidimu toxtaldi. u: «xitay ishikini taqimaydu, belki barghanséri sirtqa qarita ochuq halgha kélidu» dédi. shi jinping bu dairede, «bir yol, bir belbagh» layihesi boyiche yer sharilishish qedimige aldin ehmiyet bérishni, yéngiliq yaritish iqtidarini yaritishta sirtqa qarita échiwétishni kücheytish kéreklikini bildürdi.

u xitayning tashqi soda dairesini kéngeytidighanliqini, döletning iqtisadiy tereqqiyatida süpetni ashurushqa aldin ehmiyet bérilidighanliqini eskertti.

shi jinping 2012-yildin buyan nurghunlighan muweppeqiyetlerni qolgha keltürgenlikini alahide tekitlidi. u ötken besh yilliq mezgilde iqtisad, islahat, démokratiye we qanunning hemmidin üstünlüki, turmush ölchemlirini yuqiri kötürüsh, ékologiyelik medeniyetni berpa qilish, xitay azadliq armiyesini tereqqiy qildurush, xongkong, awmén we teywen bilen bolghan munasiwetler, xelqara diplomatiye qatarliq sahelerde muhim ilgirileshlerning qolgha keltürülgenlikini éytti.

19-qurultay 24-öktebir béyjingda axirlishidu. yighingha, her qaysi ölke, aptonom rayon, sheher, hökümet, armiye, dölet shirketliri we partiye ichidin jemiy 2287 wekil qatnashmaqta. qurultayda xitay kommunistik partiyesi merkiziy komitétining ezaliri, xitay kommunistik partiyesi siyasiy biyuro daimiy komitétining ezaliri yéngilinidu.

qurultayni yerlik we chet elning 3 mingdin artuq muxbiri yéqindin közetmekte.