iraq armiyesi kerkükke kirdi

türkiye awazi radiyosi xewiri: iraq bash ministiri heyder elibadi, kerkükning pütkül ammisining hayati bixeterlikini qoghdash toghrisida yolyoruq chüshürdi. iraq dölet téléwiziye qanilining xewiride, «bash ministir heyder elibadi, armiyege kerküktiki barliq ahalining jan bixeterlikini qoghdash toghrisida yolyoruq chüshürdi» dégen ibarilerge orun bérildi.

elibadi, kerkükning bixeterlikini qoghdashta sheher xelqi we peshmerge bilenmu hemkarliq ornitilishini telep qildi.

xewerde yene, térrorizmgha qarshi küresh küchliri, 9 – birigada we birleshme saqchi qisimlarning toqunushsizla keng rayonning kontrolluqini kapaletke ige qilghanliqi qeyt qilinghan halda, ibadining «birleshme herbiy heriketler qomandanliqi bayriqi astida heshdushshebimu kerkükning sirtida armiyege hemnepes bolidu» dégen sözlirige orun bérildi.

iraq dölet téléwiziye qanili ikranining ong bulungigha «nishanimiz kerkük xelqining salametliki» dégen xet orunlashturuldi.

iraq kord rayonluq hökümiti xewpsizlik agéntliqining tiwittér adrési arqiliq tarqitilghan bayanattimu, iraq armiyesi we heshdushshebining kerkükning jenubidiki tazexurmatudin keng kölemlik heriketke ötkenliki bildürüldi. bayanatta, mezkur küchlerning nishanining kerkük shehirige kirip, peshmergening kontrolluqidiki «k-1 herbiy bazisi» we néfit quduqlirini qolgha élish ikenliki qeyt qilindi.

iraq birleshme herbiy heriketler qomandanliqi bolsa,  kerküktiki qoralliq guruppilarni merkiziy hökümet qisimlirigha oq chiqarmasliq toghrisida agahlandurdi؛ qomandanliqning yazma bayanatida, «kerküktiki qoralliq guruppilarni merkiziy hökümetge qarashliq xewpsizlik küchlirige oq chiqarmasliq toghrisida agahlandurimiz» dégen ibarilerge orun bérildi.

peshmerge qomandanliridin polkownik salar teymur, iraq armiyesi we heshdushshebi  küchlirining kerkük sheher merkizining jenubigha jaylashqan tazexurmatu bazirigha yéqin jaylardiki nishanlargha oq chiqarghanliqini, toqunushlarning dawamlishiwatqanliqini bildürgenidi.