qatarmu arakanliq musulmanlar üchün heriketke ötti
qatar yardem jemiyiti arakanliq musulmanlar yardem qilish üchün b d t musapirlar aliy komissarliqi bilen kélishim tüzdi.
türkiye awazi radiyosi xewiri: qatar yardem jemiyiti arakanliq musulmanlargha yardem qilish üchün birleshken döletler teshkilati musapirlar aliy komissarliqi bilen hemkarliq ornitish toghrisida kélishim hasil qilishti.
jemiyet teripidin bu heqte élan qilinghan yazma bayanatta, paytext dohada imzalanghan kélishim dairiside rohingya musulmanliri üchün arakan we kachin ölkiliride 420 waqitliq qonalghu berpa qilinidighanliqi bildürüldi.
rohingyaliq 2100 musapirgha 500ming dollar yardem qilinidighanliqi qeyt qilinghan bayanatta, qatar yardem jemiyitining rohingya musulmanlirigha 2012-yildin 2017-yilghiche sehiye, ozuq-tülük, qonalghu we su qatarliq éhtiyajliri üchün texminen 4 milyon dollar inae qilghanliqi, bu ianilerdin 370 musapirning paydilanghanliqi eskertildi.
qatar yardem jemiyiti ijraiye mudiri yusuf el-qerzawi bu hemkarliq kélishimining rohingya musulmanliri éghir qiyinchiliqqa we zulumgha duch kéliwatqan nahayiti halqiliq peytte imzalanghanliqini éytti.
kélishimni imzalighan birleshken döletler teshkilati musapirlar aliy komissarliqining pars qoltuqi döletliri rayonluq wekili xalid xalifemu yardem mesiliside zor küch chiqarghan qatargha minnetdarliqini bildürdi.
birma armiyesining «qoralliq militanlargha qarshi küresh qilish»shoari astida arakan ölkiside élip bériwatqan zorawanliq qilmishlirida 25-awghusttin buyan nurghun musulman hayatidin ayrildi, bu qanliq weqelerde hujum nishani qilinghan 60din artuq yézining on nechchisi köydürüp tashlandi, on minglarche arakanliq musulmanmu bixeterlik seweblik rayondin qachti.
birma hökümitining xelqaraliq yardem organlirigha arakangha kirishige ruxset qilmasliqi seweblik ölgenlerning sanini toluq éniqlap chiqish qiyingha toxtimaqta, arakandiki ammiwi teshkilatlar arakandiki ölgenlerning sanining mingdin ashqanliqini bildürgen bolsa, bir qisim shexs we organlar ölgenlerning sanining nechche mingdin éship ketkenlikini ilgiri sürmekte.
