b d t bash katipi birmadiki weqeler toghrisida bayanat berdi
birleshken döletler teshkilati (b d t) bash katipi antonio gutérrés, birmaning arakan ölkiside «amanliq saqlash herikiti» jeryanida puqralarning öltürülgenlikidin chongqur qayghurghanliqini bildürdi.
türkiye awazi radiyosi xewiri: b d t bash katip ishxanisi bayanat élan qilip, antonio gutérrésning bu qétimqi zorawanliq weqelirining 25 – awghustta birma xewpsizlik küchlirige qilinghan hujumdin kéyin bashlighanliqini we mezkur hujumni eyibleydighanliqini uqturdi.
bu zorawanliq weqelirining perde arqisidiki saqliniwatqan mesililerning hel qilinishining ehmiyitini tekitligen gutérrés, birma hökümitining mohtajlargha yardem qilish we amanliqni saqlash wezipisi barliqini eskertti. b d t ning sabiq bash katipi kofi annan teripidin teyyarlanghan doklatta otturigha qoyulghan tekliplerni toluq qollaydighanliqini qeyt qilghan gutérrés, birma hökümitidin mezkur tekliplerni estayidil ijra qilishni telep qildi.
antonio gutérrés bangladishqa chaqiriq qilip, «onlarche yildin buyan birmadin qachqan musapirlargha sahibxanliq qiliwatqan bir dölet» ning rehberliridin, rohingyaliqlarning bangladishqa kirishige yol qoyushni dawamlashturushni telep qildi.
u yene, xeyr – saxawet organliri xizmetchilirining zorawanliq weqeliri yüz bergen jaylargha kirishige ruxset qilinishinimu telep qilip, b d t ning bu jehette birma we bangladishqa tégishlik yardemni qilishqa teyyar ikenlikini bildürdi.
birma armiyesining ötken yili öktebirde arakan ölkisidiki bir saqchi tekshürüsh nuqtisida yüz bérip, 9 saqchining hayatidin ayrilishini keltürüp chiqarghan hujumlardin kéyin bashlighan zerbe bérish heriketliri, az sanliq musulmanlarni éghir zorawanliq dolqunigha duchar qildi. mezkur heriketler tüpeyli 90 mingdin artuq arakanliq musulman yurt – makanlirini tashlap kétishke mejbur boldi. rohingya az sanliqlirining wekilliri, hazirghiche zerbe bérish heriketliride yüzlerche kishining hayatidin ayrilghanliqini bildürmekte.
birma xewpsizlik küchlirining 25– awghustta yüz bergen yuqirigha oxshash bir hujumdin kéyinki musulmanlargha qarshi bashlighan yéngi zerbe bérish herikitide nurghun puqraning hayatidin ayrilghanliqi, yene nurghunlirining öy – makanlirini tashlap kétishke mejbur bolup qalghanliqi bildürüldi.
