علییئو: بو گون اؤزگور بیر خالق اولاراق یاشاییریق
علییئو، قاراباغ بؤلگهسینین ان بؤیوک شهری اولان خانکندیده بایرام تونقالینی یاندیردیقدان سونرا خالقا سسلهندی
آذربایجان جمهوریتی جمهورباشقانی ایلهام علییئو، خانکندیده یئنی ایل بایرامی تونقالینی یاندیردی.
علییئو، قاراباغ بؤلگهسینین ان بؤیوک شهری اولان خانکندیده بایرام تونقالینی یاندیردیقدان سونرا خالقا سسلهندی.
آذربایجان خالقینین یئنی ایل بایرامینی قوتلایان علییئو، آرتیق ۴ ایلدیر نووروز تونقالینی ایشغالدان قورتاریلان بؤلگهلرده یاندیردیغینی، بونون دا بؤیوک موتلولوق اولدوغونو سؤیلهدی.
علییئو، ۶ آی اؤنجه گئرچکلشدیریلن و ۲۴ ساعاتان آز سۆرهن آنتیترور عملیاتی نتیجهسینده آذربایجانین تورپاق بوتونلوگو و اگمنلیگینین تام تامین ائدیلدیگینی خاطیرلاتدی.
ایشغالدان قورتاردیقلاری بؤلگهلرده عمران و احیا ایشلری گؤردوکلرینی، اینسانلارین آتا یوردلارینا دؤنمهیه باشلادیغینی ایفاده ائدن علییئو، "آنتیترور عملیاتی ایله ارمنیستانین آرخاسیندا هانسی گوج دورسا دورسون یولوموزدان دؤنمهیهجگیمیزی، ایستهدیگیمیزی الده ائدجگیمیزی بیر دفعه داها گؤستردیک و باجاردیق" دئدی.
علییئو، ایللرجه تورپاقلاری ایشغالدان قورتارماق اوچون چالیشدیقلارینی و حاضیرلاندیقلارینی، بو مدتده اقتصادی موستقیللیک الده ائتدیکلرینی وورغولایاراق،
"بو گون آذربایجان، سیاستی تامامیله موستقیل و یالنیز آذربایجان خالقینین منفعتلرینه و ایرادهسینه دایانان دونیاداکی نادیر اؤلکهلردن بیریدیر" دئیه دانیشدی.
ایشغال دؤنمینده اوردونو گوجلندیردیکلرینی و میللی روحا صاحب گنجلیک یئتیشدیردیکلرینی بیلدیرهن علییئو،
"تورپاق بوتونلوگوموزو و اگمنلیگیمیزی تامین ائتدیک، اولوسلارآراسی حقوقو یئرینه یئتیردیک و میللی غروروموزو یئنیدن قازاندیق. بو گون اؤزگور بیر خالق اولاراق یاشاییریق، تیکینتی ایشی آپاریریق و سونسوزا قدر بو تورپاقلاردا یاشایاجاغیق" ایفادهلرینی ایشلتدی.
آذربایجان خالقینین بایرامینی خانکندیده قوتلاماغین بؤیوک موتلولوق اولدوغونو وورغولایان علییئو، دانیشماسینی،
"۲.جی قاراباغ ساواشینین آردیندان هامیمیز غرورلا یاشاییریق. عدالتی یئنیدن تاسیس ائتدیگیمیز، تورپاقلاریمیزی ایشغالچیلاردان قورتاردیغیمیز، گوجوموزو گؤستردیگیمیز اوچون هامیمیز غرور دویوروق. بوندان سونرا هر کس بیزی حسابا قاتمالیدیر، عکس حالدا اؤزلری پئشمان اولاجاق" شکلینده تاماملادی.
ایلگیلیلی خبرلر
جمهور باشقانی اردوغان قازاخیستانین باش ناظیرینی قبول ائدیب
جمهور باشقانی رجب طیب اردوغان پایتاخت آنکارادا قازاخیستانین باش ناظیری اولژاس بکتنووو قبول ائدیب.