علییئو: باریشا هئچ اولمادیغیمیز قدر یاخینیق

آذربایجان جمهورباشقانی ایلهام علییئو، ارمنیستان ایله باریشا هئچ اولمادیقلاری قدر یاخین اولدوقلارینی سؤیله‌دی.

ناتو باش کاتیبی ینس استولتنبرگ، گونئی قافقاز سفرینین ایلک دوراغی اولاراق گئتدیگی آذربایجاندا جمهورباشقانی ایلهام علییئوله گؤروشدو.

گؤروشمه‌ده ایلهام علییئو، ناتو ایله ایلیشکیلرینین ۳۰ ایلده‌ن چوخ گئچمیشه صاحب اولدوغونو، آذربایجان باریش گوجونون کوزووو و افغانیستاندا وظیفه یئرینه یئتیردیگینی، بونون اؤزلری اوچون بؤیوک تجروبه اولدوغونو سؤیله‌دی.

آذربایجان تورپاقلارینین ایللرجه ارمنیستانین ایشغالی آلتیندا قالماسیندان، ۲.جی قاراباغ ساواشیندا و سپتامبر ۲۰۲۳ده‌کی آنتی ترور عملیاتیندان بحث ائد‌ن علییئو، "آذربایجان، اؤز تورپاق بۆتوولوگونو و اگمنلیگینی اؤزو تامین ائتدی. بو، اوزون سۆره‌ن چاتیشمالارین نئجه حل ائدیله‌بیله‌جگینین آچیق بیر نومونه‌سیدیر. چاتیشما عسگری و سیاسی یوللارلا حل ائدیلدی. بیز، بیرلشمیش میللتلر شرطی چرچیوه‌سینده‌کی مشروع ساوونما حاقیمیزدان ایستیفاده ائتدیک" دئدی.

علییئو، ارمنیستانلا باریش موذاکیره‌لرینین داوام ائتدیگینی وورغولایاراق، "باریشا هئچ بیر زامان اولمادیغیمیز قدر یاخینیق" دئیه دانیشدی.

استولتنبرگ ایسه، ارمنیستانلا آذربایجان آراسینداکی باریش سۆره‌جینه باغلی، "باریشا هئچ بیر زامان اولمادیغینیز قدر یاخین اولدوغونوزلا باغلی سؤزلرینیزی تقدیرله قارشیلاییرام. قالیجی بیر باریشا چاتماق اوچون بو فورصتدن ایستیفاده ائتمه‌نیزی دستکله‌ییرم" دئیه دانیشدی.