نظربایئو: باغیمسیزلیق قوتسال بیر دگردیر
"اوتوز ایل بوندان اول دونیاگؤروشوموزون و کیملیگیمیزین تملینده بیلینجلی اولاراق اؤزگورلوگو سئچدیک"
قازاقیستانین قوروجو جمهورباشقانی نورسلطان نظربایئو، سووئتلر بیرلیگینده‌کی ۷۰ ایللیک عضولوگون اؤلکه‌سینین له‌ینه سونوجلانمادیغینی بیلدیردی.
نظربایئو، اؤلکه‌سینین ۳۰ ایللیک مستقیللیک پروسه‌‌سینی «اگمن قازاقستان» قزئتین‌ده یاییملادیغی «باغیمسیزلیق درسلری» آدلی مقاله‌سین‌ده دگرلندیردی.
باغیمسیزلیغی اؤلکه‌سینین ان قوتسال دگری اولاراق تانیملایان نظربایئو،
"یاخین زاماندا (۱۶ دسامبردا) ان قوتسال دگریمیز اولان اؤلکه‌میزین مستقیللیگینین ایل‌دؤنومونو قوتلایاجاییق. اوتوز ایل بوندان اول دونیاگؤروشوموزون و کیملیگیمیزین تملینده بیلینجلی اولاراق اؤزگورلوگو سئچدیک. آدی چکیله‌ن دؤونم، انسانلیق تاریخی اوچون آنلیق اولسا بئله قزاقیستان اوچون بؤیوک بیر عطف نقطه‌سیدیر" فیکرینی پایلاشدی.
نظربایئو، اسکی زامانلاردا ساکا، هون و سونرالار قهرمان تورک آتالارینین بؤیوک بوزقیردا بؤیوک بیر اولوسو اولوشدوردوقلارینی خاطیرلاداراق،
«آغیر ساواشلار، باریشماز دوشمن‌چی‌لیکلر نتیجه‌سین‌ده بیر چوخ خالقین کؤچ ائتدیگی، قوما دؤیولموش داشلار کیمی داغیلدیغی و پارچا پارچا اولدوغو چتین دؤورلره باخمایاراق، قازاقلار اؤز ایلکین یورد-یوواسینی و تورک خالقلارینین آتا یوردونو قورویابیلدیلر" ایفاده‌سینی ایشله‌تدی.
اؤتن عصرده خالقینین «بؤیوک قیتلیق» حادثه‌لری، ایکینجی دونیا ساواشی و استالین رهبرلیگینین قانلی باسقیسی کیمی فاجعه‌لردن سونرا مختلیف اقتصادی پروبلئملرله موباریزه آپاردیغینا دقت چکن نظربایئو،
"سووئتلر بیرلیگینده‌کی ۷۰ ایللیک وارلیغیمیز اؤلکه‌میزین له‌ینه اولمادی" دئیه بیلدیردی.
نظربایئو، مستقیل قازاقیستان گنجلری مستقیل‌لیگه گئدن یولون نه قدر آجی وئریجی اولدوغونو بیلمه‌سی لازیم اولدوغونو وورغولایاراق،
"بونا گئچمیشه سایغی دویماق و اوندان درس آلماق لازیم‌دیر. اونا گؤره باغیمسیزلیغا آتالاریمیزین قانی ایله گلن قوتسال بیر دگر دئییرم" ایفاده‌سینه یئر وئردی.
