قوربان بایرامیندا چوگان - ابراهیم ساوالان

قدیم زامانلار قوربان بایرامی تبریزده طنطنه و احتیشاملا کئچیریلرمیش. تاریخی سندلره گؤره 500 ایل اؤنجه قوربان بایرامیندا تبریز شهرینده قویونلار قوربان ائدیلیب انجمنلرین قورولوب باده‌لر قالدیریلارمیش. صفوی حؤکمدارلاریندان محمد خدابنده، شاه‌عباس و شاه‌صفی زامانیندا یاشامیش تبریزلی شاعیر «مسیحی» اؤز دیوانیندا دفعه‌لرله بو تؤرنلری وصفه چکمیشدیر. مسیحی‌نین شعرلرینه دایاناراق اوگونلر بؤیوک مئیدانلاردا تورکلرین ان‌قدیم اویونلاریندان بیری اولان، چوگان اویونو اوینانارمیش؛ اؤز ده ویصال جانانلا بیرلیکده:

عید قوربان اولدو و قوربان دیلر مین جان سانا

ائیله‌گیل قوربان منی، کیم اولاییم قوربان سانا.

چونکو چوگان اویناماغا باشلادین مئیدان آرا

قرص خورشید اولدو توپ، و ماه نو چوگان سانا.

مین ایل اؤنجه یازیلمیش «دیوان الغات الترک» کیتابیندا چوگان اویونوندان سؤز گئدیبدیر. محمود کاشغرلی او کیتابدا «ار توبیقکینی آذری بیله تولدی» (کیشی توپونو یابا ایله توللادی، کیشی توپو باشی‌اَیری آغاجلا ووردو) جمله‌سینی قلمه آلاراق چوگان اویونوندان دانیشمیشدیر.

همه‌شه کی کیمی تحریفچی فارسلار بو اویونو فارسلارا عایید بیر اویون کیمی تقدیم ائتمه‌یه چالیشیبلار، آما آذربایجان دؤولتی لاییقی ایقداملارلا بو اویونو یونسکو لیسته‌سینده آذربایجان آداینا ثبت ائدیب بو تحریفه مانع اولدو. بیز بو گؤزل ایشه آددیم آتان اینسانلارا «ساغول» دئییب مختلف بایراملاردا تبریز مئیدانلاریندا، چوگان کیمی اویونلاری بیر داها تاماشا ائتمه‌یی صبیرسیزلیکله گؤزله‌ییریک.