علییئو، آمریکا دیش ایشلری باخانی ایله دانیشدی
"آمریکا باشقانینین بو آچیقلاماسی، آذربایجان یؤنتیمی و توپلومو طرفیندن راحاتسیزلیقلا قارشیلاندی"
آمریکا خاریجی ایشلر باخانی آنتونی بلینکن، آذربایجان جمهورباشقانی ایلهام علییئو ایله قاراباغ قونوسوندا دانیشدی.
آمریکا خاریجی ایشلر سؤزچوسو ند پرایس، بلینکن ایله علییئو آراسینداکی تلفن دانیشماسینا باغلی وئردیگی آچیقلامادا،
"باخان بلینکن ایله جمهورباشقانی علییئو، آمریکا ایله آذربایجان آراسینداکی ایکیلی اورتاقلیغین اؤنمینه وورغو ائتدیلر و بیر چوخ قونونو اله آلدیلار" ایفادهلرینی ایشلتدی.
بلینکنین اینسان حاقلاری و تمل اؤزگورلوکلرین اؤنمینی تکرارلادیغینی ایفاده ائدن پرایس،
"باخان، آوروپا گوونلیک و امکداشلیق تشکیلاتی چرچیوهسینده مینسک قروپو باشقانلارینین بؤلگهدهکی بوتون اینسانلارین فایداسیندا داغلیق قاراباغ بؤلگهسیندهکی چاتیشمالارا قالیجی سیاسی حل گتیرمه چابالارینین اؤنمینه دقت چکدی" دئدی.
علییئو ایسه، آمریکا باشقانی جو بایدنین ۱۹۱۵ حادثهلرینی "سویقیریم" اولاراق تانیملاماسینا توخوناراق،
"تورکیه، آذربایجانین یاخین دوستو و متفیقیدیر. ساواش سونراسی دؤورده بؤلگهمیزده چوخ اؤنملی و مثبت رول اویناییر. آمریکا باشقانینین بو آچیقلاماسی، آذربایجان یؤنتیمی و توپلومو طرفیندن راحاتسیزلیقلا قارشیلاندی" ایفادهلرینی ایشلتدی.