بمت-نین اوکراینا‌لی قادین‌لار و قاچیریلان اوشاق‌لارلا علاقه‌دار آچیقلاماسی

بیرلشمیش میللت‌لر تشکیلاتی‌نین اوشاق فوندونون (یونیسف) فوق العاده حال‌لار پروقرام‌لار مودیری مانوئل فونتین اوکراینایا سفریندن سونرا بیرلشمیش میللت‌لر تشکیلاتی‌نین (بمت) تهلوکه‌سیزلیک شوراسیندا کئچیردیگی بریفینقده روسیا ایله 24 فوریه‌دن بری داوام ائدن محاربه‌ده 142 اوشاغین حیاتینی ایتیردیگینی، 229 اوشاغین یارالاندیغینی بیلدیریب.

اوکراینادا یاشایان تخمینن 3،2 میلیون اوشاغین یاری‌سی‌نین کیفایت قدر قیدایا چیخیشی اولمادیغیندان ناراحات اولدوق‌لارینی ایفاده ائدن مانوئل فونتین 1،4 میلیون اینسانین آلت یاپی لارا ائدیلن هوجوم‌لار سببیله سویا چیخیشی‌نین اولمادیغینی وورغولاییب.

ماریوپل و خرسون شهرلرینده وضعیتین داها پیس اولدوغونا دقت چکن مانوئل فونتین اؤلکه داخیلینده مکتب‌لرین باغلانماسی‌نین 5،7 میلیون اویرنجییه تأثیر ائتدیگینی بیلدیریب.

بمت-نین اوکراینا قادین‌لار بؤلمه‌سی‌نین مودیری سیما باهوس ایسه تجاوز و جینسی زوراکی‌لیق ادعا‌لاری‌نین آرتدیغینا دقت چکه‌رک، موستقیل آراشدیرما آپاریلماسینا چاغیریب.

امریکانین بمت-ده‌کی دایمی نوماینده‌سی لیندا توماس گرینفیلد ده اوکراینا‌لی قاچقین‌لارین 90 فایزی‌نین قادین و قیزلار اولدوغونا دقت چکیب و یئرلی رسمی‌لره گؤره، بعضی اوکراینا‌لی قادین و قیزلارین روسیا عسگرلری‌نین تجاووزون‌دن خلاص اولماق اوچون ساچ‌لارینی قیسالتدیق‌لارینا دقت چکیب.

روسیانین بمت-ده‌کی دایمی نوماینده‌سی‌نین معاوینی دیمیتری پولیانسکی ایسه ادعا ائدیب کی، بو ادعا‌لار روسیا قوه‌لرینی "اعتباردان سالماق" مقصدی داشییان یالان‌لاردیر.

اوکراینانین بمت-ده‌کی دایمی نوماینده‌سی سرگئی کیسلیتا دا بمت تهلوکه‌سیزلیک شوراسینداکی چیخیشیندا روسیانی اوکراینا‌لی اوشاق‌لاری اؤولادلیغا گؤتورمک اوچون قاچیرماقدا اتهام ائدیب.

روسیانین ماریوپل و دونتسک کیمی یئرلردن اوشاق‌لاری قاچیردیغینی ادعا ائدن کیسلیتا "ایشغالچی‌لار 121 میندن چوخ اوشاغی اوکراینا‌دان چیخاریب‌لار" دئییب.