ایسرائیللی ناظیر: ایسرائیل اوردوسو غزه‌ده حربی رژیم قوراجاق
ناظیر سموتریچ غزه‌ده ساخلانیلان ایسرائیللی محبوسلارلا باغلی بیلدیریب کی، بوتون محبوسلارین ساغ-سالامات گئری قایتاریلاجاغینا سؤز وئرمک رئال دئییل
ایسرائیلین ایفراطچی ساغچی مالییه ناظیری بزالل سموتریچ اؤلکه‌سینین ایشغالی و هوجومو آلتیندا اولان غزه‌ده اوردونون حربی رژیم قوراجاغینی بیان ائدیب.
ایسرائیلده یاییملانان کانال 12 تلویزیاسینا دانیشان سموتریچ اوردونون غزه‌ده حربی رژیم قوراجاقلارینی و بو رژیمین بؤلگه‌یه نظارت ائده‌جیینی بیلدیریب.
سموتریچ بوتون کابینه عضولرینین اوردونون غزه‌ده قالماسی ایله باغلی راضیلیغا گلدییینی ادعا ائدیب.
اؤزونون و دیگر ایسرائیل کابینه عضولرینین بیرلشمیش میللتلر تشکیلاتینین فیلیسطینلی قاچقینلارا یاردیم آژانسی (اونروا) واسیطه‌سیله غزه‌ده فیلیسطینلیلره یاردیمین چاتدیریلماسینا قارشی اولدوقلارینی ایفاده ائدن سموتریچ، فیلیسطینلیلره اینسانی یاردیمین پایلانماسی پروسئسینین ایسرائیلین نظارتی آلتیندا اولماسینین لازیم اولدوغونو مودافیعه ائتدی.
ناظیر سموتریچ غزه‌ده ساخلانیلان ایسرائیللی محبوسلارلا باغلی بیلدیریب کی، بوتون محبوسلارین ساغ-سالامات گئری قایتاریلاجاغینا سؤز وئرمک رئال دئییل.
بو فیکیرلری ایسرائیللی محبوسلارین یاخینلارینا چاتدیردیغینی بیلدیرن سموتریچ عائیله‌لره «گؤزونوزون ایچینه باخیب اونلارین هامیسینی ساغ-سالامات گئری قایتاراجاغینا سؤز وئرن آدام دوغرو دانیشمیر» دئییب.
سموتریچ ادعا ائدیب کی، محبوسلارین یاخینلارینین حؤکومتی تعجیلی محبوس موبادیله‌سی آنلاشماسی باغلاماغا چاغیران اعتراض و نوماییشلر محبوسلارین دیری-دیری ائولرینه قایتاریلماسی ایمکانلارینی ضعیفلتدی.
