ایران: قاتقی وئرمهیه حاضریق
ایرانین خاریجی ایشلر باخانی حسین امیرعبداللهیان و اوکراینالی قونومداشی دمیترو کولئبا آراسیندا تلفندا دانیشدی
ایرانین خاریجی ایشلر باخانی حسین امیرعبداللهیان، قارا دنیزده قورولاجاق گوونلی تاخیل دالانی آنلاشماسینا قاتقی وئرمهیه حاضر اولدوقلارینی بیلدیردی.
ایران خاریجی ایشلر باخانلیغیندان وئریلن بیلگییه گؤره، حسین امیرعبداللهیان و اوکراینالی قونومداشی دمیترو کولئبا آراسیندا تلفن دانیشیغی اولدو.
تلفن دانیشماسیندا، ایکیلی ایلیشکیلر و اولوسلارآراسی پروسهلرین موذاکیر ائدیلدیگی بیلدیریلیر.
۲۹ ژوئنده ایران حمهورباشقانی ابراهیم رئیسی ایله روسیا درولت باشقانی ولادیمیر پوتین آراسیندا باش توتان گؤروشمهیه ایشاره ائدن عبداللهیان، اؤلکهسینین اوکرایناداکی ساواشا قارشی اولان توتومونو بیر داها تکرارلادیغینی بیلدیردی.
ایران و اوکراینا آراسیندا ایلیشکیلرین همیشه دوستلوق، سایغی، قارشیلیقلی چیخارلار و امکداشلیق چرچیوهسینده داوام ائتدیریلدیگینی بیلدیرهن عبداللهیان:
"بیز قارا دنیزده تاخیل دهلیزینین آچیلماسی ایله باغلی آنلاشمایا قاتقی وئرمهیه حاضیریق" دئدی.
اوکراینانین خاریجی ایشلر باخانی دمیترو کولئبا ایسه، اکینچیلیک و تاخیل مسئلهسی داخیل اولماقلا ایکیلی ایلیشکیلری اینکیشاف ائتدیرمهیه حاضیر اولدوقلارینی سؤیلهدی. دمیترو کولئبا تهران و کیئو آراسیندا مثبت ایلیشکیلرین گلیشدیریلمهسی اوچون دیالوگون داوام ائتدیریلمهسینین اؤنمینی وورغولادی.
دونیانین ان بؤیوک تاخیل اۆرهتیچیسی اولان روسیا و اوکراینا آراسینداکی ساواشین ارزاق بحرانینا چئوریلمهسینین قارشیسینی آلماق اوچون بیرلشمیش میللتلر، روسیا، اوکراینا و تورکیهنین ایشتیراکی ایله بؤلگهدهکی میلیونلارجا تون تاخیلین دونیا بازارینا چیخاریلماسی پلانلاشدیریلیر. پروژه مرحلهسیندهکی پلانا اساساً، تاخیل محصوللاری قارا دنیز اوزریندن دونیا بازارلارینا چیخاریلاجاق.