پاکستان، آذربایجانین تورپاق بوتؤولویونو دستکلدیگینی تکرارلادی
علوی، آذربایجانین دؤولت باشقانینین اوزاق‌گؤره‌ن سیاست‌چی اولدوغونو وورغولادی
آذربایجان خاریجی ایشلر باخانی جیحون بایراموو ۱۴ ژانویه‌ده پاکیستانا رسمی سفری چرچیوه‌سین‌ده پاکیستان ایسلام جمهوریتی پرزیدنتی عارف علوی ایله گؤروشدو.
پاکیستان پرزیدنتی علوی صمیمی سلاملارینی پرزیدنت ایلهام علی‌یئوه چاتدیرماغی خاهیش ائدیب، آذربایجان پرزیدنتینی پاکیستان‌دا آغیرلاماقدان ممنونلوق دویاجاغینی بیلدیردی. آیریجا، آذربایجان تورپاقلارینین ایشغال‌دان آزاد اولونماسی و الده اولونان غلبه موناسیبتی ایله تبریک ائتدی، پاکیستانین آذربایجانین تورپاق بوتؤولویونو دستکلدیگینی تکرارلادی.
عارف علوی قوشولماما حرکاتینین باکی‌دا گئچیریله‌ن دؤولت و حکومت باش‌چیلارینین ذیروه توپلانتی‌سین‌دا ایشتیراکینی و بو زامان آذربایجان جمهوریتی پرزیدنتی ایله گؤروشونو خاتیرلاتدی، آذربایجان دؤولت باشقانینین اوزاق‌گؤره‌ن سیاست‌چی اولدوغونو وورغولادی.
هر ایکی اؤلکه‌نین بؤلگه‌سل چاتیشمالارین اولوسلارآراسی حقوق پرینسیپلری اساسین‌دا حلینه دایر توتوملاری و بو قونو‌دا گؤستریلن قارشی‌لیق‌لی دستک بیلدیریلدی.
پاکیستان پرزیدنتی، آیریجا ایکی اؤلکه آراسین‌دا ایکی‌لی ایلیشکیلرین گلیشمه‌سی، او جمله‌دن اقتصاد، تیجارت و دیگر ساحه‌لرده امکداشلیغین داها دا گئنیشلندیریلمه‌سینین اؤنمینی وورغولادی.
جیحون بایراموو، ایسه آذربایجان جمهوریتی پرزیدنتی ایلهام علی‌یئوین صمیمی سلاملارینی پاکیستان دؤولت باش‌قانینا چاتدیردی. پاکیستانین آذربایجانین اولوسلارآراسی حقوقا و عدالته دایالی توتومونا وئردیگی دستگی وورغولایان باخان اؤزللیکله ۴۴ گونلوک وطن ساواشی دؤورون‌ده دوست و قارداش اؤلکه پاکیستانین وئردیگی دسته‌یه تشکرونو بیلدیردی.
گؤروشمه‌ده طرفلر ایکی‌لی امکداشلیغین گله‌جک‌ده داها دا گلیشدیریلمه‌سی اوزره عزملی اولدوقلارینی ایفاده ائتدیلر.
ایلگیلی‌لی خبرلر
حوثی لر:"ایسراییل گمیسینی ووردوق"
یمن-ده‌کی حوثی لر عدن کؤرفزینده ایسراییل گمیسینی ووردوق‌لارینی بیلدیریب‌لر.
