"AQŞtan röxsät soramıybız"

Törkiyä ilbaşı Räcäp Tayyip Ärdoğan İstanbulda jurnalistlarnıñ sorawlarına cawap birde.

Ärdoğan Rusiyädän alınğan S-400 hawa saqlanu sistemalarınıñ sınap qaraluı belän bäyle bularaq tübändägelärne citkerde: “Testlar yasaldı, yasala häm Amerika Quşma Ştatlarınıñ totışı bezne qızıqsındırmıy. Bez qulıbızdağı mondıy mömkinleklärne sınap qaramıy buldıra almıybız. AQŞtan röxsät sorıyqmeni? S-400 genä tügel, şaqtıy qorallarnı test aşa uzdırabız. Monnan soñ da başqarılır bu. Greŝiya qulında S-300lär bar. Test qına tügel, qullanalar da äle alarnı. AQŞ alarğa berär närsä äytäme? Bez täwäkkälbez, yulıbıznı da şuşı täwäkkällek belän däwam itteräçäkbez.”

Azärbaycan-Ärmänstan arasında utnı tuqtatu çaqıruları mäs’äläsen quzğatqan ilbaşı Ärmänstannıñ monnan alda birgän süzlären cirenä citkermäwen belderde.

İke il arasında uzaçaq ixtimallı söyläşülärdä Törkiyäneñ dä qatnaşırğa xoquqı buluın äytkän Ärdoğan bolay dip däwam itte: “Azärbaycan ilbaşı İlham Aliyevnıñ süzlärenä bitaraf qalırğa yaramıy. Monda Rusiyä ni qadär çişeleş häm tınıçlıq öçen urın alırğa teli ikän, Törkiyäneñ dä kim digändä Rusiyä qadär urın alu xoquqınıñ buluına ışanam. Bu mäs’älädä älegä Rusiyä tiskäre totışı kürsätmäde. Törkiyä belän bäyle bularaq tiskäre açıqlaw da yasamadı. Xäzergä qadär bez Azärbaycan-Ärmänstan mäs’äläsendä dä, qalğan mäs’älälärdä dä urtaq êşçänlek başqarabız. Monnan soñ da uñışlı adımnar yasap, çişeleşkä qawıştırırbız dip ömetlänäm.”