Tatarstanda törek fotografı kürgäzmäse

18nçe noyabr’dä Tatarstan Milli muzeyında törek fotoğrafı İsmail Haykırnıñ sänğät belgeçe Liliyä Sattarova belän bergäläp başqarğan tikşerenü proyektı qısalarında “Anadolunıñ Sälcuqlı mönbärläre: İslam sänğäteneñ güzäl ürnäkläre” isemle kürgäzmäse açıldı (videoyazma).

Kürgäzmädä foto ostasınıñ Anadolunıñ törle tarixi mäçetlärendä 2015nçe-2021nçe yıllar aralığında töşerelgän 40 tarixıy mönbär fotosürätläre kürgäzmälänä.

Tatarstan belän Törkiyä arasında tarixıy häm mädäni yaqtan yaqın êlemtälärneñ buluına iğ’tibarnı yünältüçe Törkiyäneñ Qazan baş konsulı İsmät Äriqan: “Urtaq yaqlarıbız küp. Telebez, dinebez ber. Şuña kürä divarlardağı bu fotolar sezgä çit bulmayaçaq. Bu kürgäzmä divarlarında barı tik fotografiyälär genä kürsätelmi. Monda şulay uq Tatarstanda tabılğan häm yaqınça ber çorğa qarağan fayans sänğäte misalların da küräsez. Yäğ’ni bäyläneş buluı bik yaxşı añlaşıla”, - dip äytte.

Tatarstan möftiyeneñ berençe urınbasarı İlfar xäzrät Xäsänov tä törek konsulınıñ fikerlären küätläp çığış yasadı.

17nçe dekabr’gä xätle däwam itäçäk “Anadolunıñ Sälcuqlı mönbärläre: İslam sänğäteneñ güzäl ürmäkläre” isemle fotokürgäzmäneñ açılışın videoyazmadan qarıy alasız.

---------

18 ноябрьдә Татарстан Милли музеенда төрек фотографы Исмәгыйль Хайкырның сәнгать белгече Лилия Саттарова белән бергәләп башкарган тикшеренү проекты кысаларында “Анадолуның Сәлҗуклы мөнбәрләре: ислам сәнгатенең гүзәл үрнәкләре” исемле күргәзмәсе ачылды (видеоязма).

Күргәзмәдә фото остасының Анадолуның төрле тарихи мәчетләрендә 2015нче-2021 нче еллар аралыгында төшерелгән 40 тарихый мөнбәр фотографиясе күргәзмәләнә.

Фото күргәзмә 17 нче декабрьгә кадәр дәвам итәчәк.