Tatarstan xäbärläre 17/2024

Miñnexanov: Bez Törkiyä biznesınıñ Tatarstannı saylawı belän qızıqsınabız

Tatarstan Räise Röstäm Miñnexanov Törkiyä prezidentı administraśiyase qarşındağı İnvestiśion ofis citäkçese Burak Dağlıoğlu belän oçraştı. Alar Rusiyä-Törkiyä mönäsäbätläre qısalarında xezmättäşlekne alğa taba üsterü turında fiker alıştı. Bu turıda Tatarstan citäkçese matbuğat xezmäte xäbär itä.

“Tatarstan belän Törkiyä xezmättäşlegeneñ tarixı ozın. Delegaśiyalärneñ üzara säfärläre ğamälgä aşırıla, säwdä-iqtisadi häm gumanitar êlemtälär üseş ala. Bezneñ bağlanışlarnı üsterügä daimi aviaêlemtä yärdäm itä,” – dide Röstäm Miñnexanov.

Törkiyä qunağı êş säfäre qısalarında “Alabuğa” maxsus iqtisadi zonası rezidentlarınıñ citeşterü mäydançıqlarında buldı, Qazandağı General’ konsullık xezmätkärläre belän oçraştı, şulay uq Tatarstannıñ Berdäm prezentaśiya üzägendä investiśion potenśialı belän tanıştı.

Bıyıl QazanForum xalıqara forumında 16 meñnän artıq keşe qatnaşaçaq

“Rusiyä - İslam dön’yası: QazanForum” Xalıqara iqtisadi forum 15 yıl êçendä üzen İslam illäre belän xezmättäşlekneñ ışanıçlı mäydançığı bularaq kürsätte. Bıyıl 6,3 meñnän artıq çaqıru cibärelgän, 16 meñnän artıq keşe qatnaşuı planlaştırıla. Bu xaqta Mäskäwdä oyıştıru komitetı utırışında Tatarstan Räise Röstäm Miñnexanov belderde.

Röstäm Miñnexanov iskärtkänçä forum qısalarında investiśiya, islam finansları, mädäniyät, sport, fän, turizm, xalıqara säyäsät häm başqa aktual’ temalar buyınça 125 sessiya uzdırılaçaq.

“Rusiyä – İslam dön’yası: QazanForum” 15nçe Xalıqara iqtisadi forumı Qazanda 14-19 mayda uza.

Dubayda Saban tuyı uzdı

Uzğan yäkşämbe Berlӓşkӓn Ğaräp Ämirlekläreneñ Dubay şähärendä tatar xalqınıñ milli bäyräme – Saban tuyı uzdı. Bu xaqta Bötendön’ya tatar kongressınıñ matbuğat xezmäte xäbär itä.

Programmağa bilbaw köräşe, törle milli uyınnar häm master-klasslar, tatar artistları qatnaşında konśert, market zonası, milli rizıqlar täqdim itelgän zona, tatar cır-biyüläre kerde häm tanılğan tatar dramaturgı Tufan Miñnullin p’yesası motivları buyınça töşerelgän “Äldermeştän Älmändär” fil’mı kürsätelde.

Saban tuyında şulay uq Tatarstannan kilgän maxsus qunaqlar – cırçılar Zäynäb Färxetdinova häm Rayaz Fasıyxov qatnaştı.

Sankt-Peterburgta Ğabdulla Tuqaynıñ tuuına 138 yıl tuluğa bağışlanğan tantanalı çara uza

2024 yılnıñ 26 aprelendä böyek tatar şağıyre Ğabdulla Tuqaynıñ tuğan könendä, Sankt-Peterburg üzägendäge Tuqay skverında tradiśion “Tuqay uquları” uzaçaq. Bu xaqta Tatarstannıñ Sankt-Peterburg şähäre häm Leningrad ölkäsendäge Daimi wäkillege matbuğat xezmäte xäbär itä.

“Tuqay uquları” Tatarstannıñ Sankt-Peterburg şähäre häm Leningrad ölkäsendäge Daimi wäkillege tarafınnan şähärneñ tatar cämäğat’çelege belän berlektä ütkärelä. Çarağa Sankt-Peterburg xakimiyäte, Sankt-Peterburg Millätlär yortı, tatar milli-mädäni oyışmaları wäkillären, şağıyr’lärne, icat êşleklelären, Xärbi-diñgez institutı kursantların çaqıralar.

Sankt-Peterburgta tatar tele kurslarına yörüçelär sanı 8 tapqırğa artqan

Sankt-Peterburgta tatar tele kursları däwam itä. 14 aprel’dä çirattağı däreslär bulğan. Bu xaqta Sankt-Peterburg şähäre häm Leningrad ölkäse tatarları portalında xäbär itälär.

“Kurslar êşli başlağan çor belän çağıştırğanda kilüçelär sanı sigez tapqırğa arttı. Bezdä tulı sostavlı ğailälär, duslar, abıy belän señel, señellär, filologlar, yäş’ ğalim, yäş’ psixolog belem ala. Bu äle tulı isemlek tügel. Bezne bergä bulu, üzebezneñ telebezdä söyläşü teläge berläşterä. Öy miçendä peşkän tatar rizığı bezne härwaqıt bergä cıya,” – diyelä xäbärdä.