Tatarstan xäbärläre 16/2024

 Tatarstan Räise Qıtayğa säfär qıldı

Tatarstan Räise Röstäm Miñnexanov uzğan atnada êş säfäre belän Qıtayğa, Śzilin’ provinśiyäseneñ Çançun’ şähärenä kilde. Miñnexanov säfär qısalarında cirle predpriyätiyelärdä buldı, “Śzilin’ – Tatarstan” tügäräk östälendä qatnaştı, şulay uq provinśiya citäkçeläre belän oçraştı.

Tatarstan Riäseneñ Śzilin’ provinśiyäse gubernatorı Xu Yuytin belän oçraşuında säwdä, finans, sänäğat’, texnologiya häm transport - logistika tarmaqlarında, şulay uq gumanitar ölkädä xezmättäşlekne alğa taba üsterü turında süz bardı.

Tatarstan Törkiyä biznesınıñ töbäktä proyektlarnı üsterüe belän qızıqsına

 Tatarstan Törkiyä biznesınıñ alğa taba da töbäktä üz proyektların üsterüe häm respublikanı Rusiya belän Avraziya bazarlarına çığu öçen mäydançıq bularaq qullanuı belän qızıqsına. Bu xaqta Tatarstan Räise Röstäm Miñnexanov Rusiya häm Törkiyä êşquarları assośiaśiyäse delegaśiyäse belän oçraşuda citkerde. İdarä räise Ärdäm Ädcäy citäkçelegendäge Rusiya häm Törkiyä êşquarları assośiaśiyäse delegaśiyäse wäkilläre 8-10 nçı aprel’ könnärendä Qazanğa töbäkneñ investiśion klimatı belän tanışu, yaña êşlekle êlemtälär urnaştıru öçen êş säfärenä kilde.

Tatarstan Räise oçraşuda “Bez Tatarstan – Törkiyä säwdä-iq’tisadi häm investiśion xezmättäşlegen üsterügä zur ähämiyät biräbez” dip belderde. Röstäm Miñnexanov bilgeläp uzğança, bügen Tatarstan bezneñ illär arasında näticäle êlemtä zvenosı bulup tora.

Tatarstan Räise iskä töşergänçä, Tatarstan belän Törkiyä arasında xezmättäşlek turında kileşü ğamäldä, Qazanda - Törkiyäneñ General’ konsullığı, ä İstanbulda Tatarstan wäkillege bar. Monnan tış Qazannıñ Änkara, İstanbul, Antaliya, İskeşähär belän tuğanlıq mönäsäbätläre bar. 

Muniśipal’ däräcädä dä êlemtälär ğamäldä, 19 tuğandaşlıq turında kileşü tözelgän. Tatarstan belän Törkiyäne daimi aviaêlemtä bäyläwe dä uñay yoğıntı yasıy.

“Törkiyä -Tatarstan öçen äydäp baruçı çit il partnyerlarınıñ berse. Uzğan yıl bezneñ tovar äyläneşe yaqınça 3 milliard AQŞ dolları täşki itte, 2022 nçe yılğa zur üseş kürsätte. Bez respublikağa 2 milliard AQŞ dollarına yaqın investiśiya salğan Törkiyä biznesına räxmätle”,- dide Tatarstan Räise Röstäm Miñnexanov.

Yaña Tatar bistäse ziratında Ğabdulla Tuqay qaberenä çäçäklär saldılar

15 nçe aprel’dä Qazannıñ Yaña Tatar bistäse ziratında tatar xalqınıñ böyek şağıyre Ğabdulla Tuqay qaberenä çäçäklär salu märasime buldı. Çara xäzrätneñ doğaları belän başlanıp kitte. İskä alu märasimendä tanılğan yazuçılar, kiñ cämäğat’çelek wäkilläre, Tuqaynıñ öç muzeyı - Qazan, Qırlay häm Ural’sk muzeyları citäkçeläre qatnaştı. Çara yazuçılarnıñ çığışları belän däwam itte. Yazuçılar Yaña Tatar bistäse ziratındağı küp qaberlär, şul isäptän Zäytünä Mäwlüdova qaberläre yanında doğa qıldılar.

Tatarstan möselmannarı cıyılması Aşxabadta Xalıqara xokkey turnirında qatnaşa

15-21 nçe aprel’ könnärendä Törekmänstan başqalası Aşxabadta Xalıqara xokkey turnirı uza, anda törle illärdän 10 häwäskär komanda qatnaşa. Tatarstan cıyılmasın “ORXİS – Qazan” komandası täq’dim itä, anıñ sostavında Tatarstan möftiye Kamil xäzrät Sämiğullin citäkçelegendä respublika möselmannarı uynıy. ORXİS – uzğan yıl Qazanda oyıştırılğan islam illäreneñ xokkey üseşe oyışması.

Turnirda Törekmänstan, İran, Oman, Baxreyn, Üzbäkstan, Belarus’, Qazaqstan, Qırğızstan, Tatarstan, Törkiyä komandaları qatnaşa.

Tapşıruda Tatarstan Räiseneñ matbuğat xezmäte, “Tatar-inform” xäbär agentlığı  yazmaları qullanıldı.