Tatarstan xäbärläre 13/2024
Tatarstan häm tatar dönyasındağı qayber waqıyğalarğa qısqaça küzätü
Qazan üzägendä “Krokus Siti Xoll”da terakt qorbannarı istälegenä memorial oyıştırıldı
Qazan üzägendä, Bauman uramındağı sägät’ yanında, Mäskäw ölkäsendä “Krokus Siti Xoll”dağı faciğa qorbannarı istälegenä memorial oyıştırılğan. Anda çäçäklär sala başladılar, dip söylädelär Qazan mêriyasendä.
Monnan tış, “Aq Bars Arena” mediafasadında teraktta hälak bulğannar öçen qayğı şäme payda buluı bilgele buldı.
23 martta respublikada massaküläm çaralar uzdıru tuqtatıldı.
İskärtik, Mäskäw ölkäsendäge konśertlar zalına höcümdä 139dan artıq keşe faciğa qorbanı buldı, 182 keşe yaralandı.
Ravil Ğaynetdin “Krokus”ta keşelärne qotqarğan 15 yäş’lek İslam Xälilovnı büläkläyäçäk
Rusiyä möselmannarınıñ Diniyä näzaräte liderı Möfti Şäyex Ravil Ğaynetdin yäş’ geroy – 15 yäş’lek İslam Xälilovnı möselmannarnıñ yuğarı bülägenä täqdim itte. Ul terakt waqıtında “Krokus Siti Xoll” binasınnan 100dän artıq keşene alıp çıqqan. Bu xaqta Rusiyä Möftilär şurası xäbär itä.
Möfti Şäyex Ravil Ğaynetdin Mäskäw Cämiğ mäçete mäxällä keşeläre – ätile-ullı Xälilovlarğa şäxsi çaqıru tapşırdı. İzge Ramazan ayında comğa könne Mäskäw Cämiğ mäçetendä bezneñ 15 yäş’lek İslam büläklänäçäk. Aña qıyulığı häm keşelärne qotqarğanı öçen Rusiyä möselmannarınıñ “Xezmätläre öçen” medale tapşırıla.
İslam “Krokus Siti Xoll” konśert zalı garderobında êşlägän.
Tatarstannan çittäge jurnalistlar öçen 2nçe Bötenrusiyä “Xäbär” bäygese iğlan itelde
Bötendönya tatar kongressı Tatarstannan çittä näşer itelüçe tatar telle gazetlar, tele- häm radiotapşırular redakśiyaläre häm jurnalistları arasında 2nçe Bötenrusiyä “Xäbär” konkursı uzdıra.
Konkurs 2024 yılnıñ 1 aprelennän 2024 yılnıñ 1 oktäbrenä qadär ütkärelä. Konkurska 2023 yılnıñ 1 oktäbrennän alıp 2024 yılnıñ sentäbr’ ayına qadär basılğan, êfirğa çıqqan êşlär qabul itelä. Konkurs tübändäge nominaśiyalärdä ütkärelä: “Ürnäk ğailä”, “Şäxes”, “Yäş’ korrespondent”.
Tübän Kamanıñ “Bigeş” aêroportında namaz bülmäse açıldı
Tübän Kamanıñ “Bigeş” aêroportında namaz bülmäse açıldı.
Älege çarada Tatarstan möftiye Kamil xäzrät Sämigullin, Tübän Kama muniśipal’ rayonı başlığı Ramil Mullin, Tübän Kama töbäge kazıyı häm imam-möxtäsibe Salix xäzrät İbrahimov h.b. qatnaştı.
Namaz bülmäse passajirlar öçen uñaylı, tınıç, cılı urında urnaşqan. Xatın-qızlar öçen namaz uqu urını pärdä belän bülengän. Bülmädä qıybla yünäleşe bilgelängän, kelämnär cäyelgän, dini ädäbiyat urın alğan.
Bülmädän yıraq tügel genä barlıq uñaylıqlar tudırılğan täharät alu urını bar.
Alabuga mäçetlärendä kön sayın 200 keşelek iftar ütkärelä
Alabuga şähäreneñ Cämiğ mäçetendä kön sayın 200dän artıq keşegä isäplängän tabın äzerlänä. Şähär häm rayon mäçetlärendä xalıq kümäk iftarğa cıyıla.
İftar ütkärergä teläwçelär şaqtıy küp, inde Ramazan ayınıñ azağına qadär ük här köngä yazılğannar. Aşnı ğailä belän yäki törkemläp ütkärüçelär dä bar, şulay uq ber keşe dä bulırğa mömkin.
Äytergä kiräk, iftar aşları şähärneñ Nur, Äcmäl, Şatlıq, Äl’-qadıyr mäçetlärendä dä ütkärelä, awıllarda da uzdırıla.
