Tatarstan xäbärläre 12/2024
Tatarstan häm tatar dönyasındağı qayber waqıyğalarğa qısqaça küzätü
Röstäm Miñnexanov Tatarstanda Sabantuy könnären rasladı
Tatarstan Räise Röstäm Miñnexanov 2024 nçe yılda uzaçaq Saban tuyı könnären rasladı. Tiyeşle ukaz Tatarstan citäkçeseneñ räsmi portalında bastırıldı. Respublikanıñ rayon üzäklärendä häm awıllarında tatar xalıq bäyräme 8-9 nçı iyün’dä, Yar Çalllıda -15 nçe iyün’dä, Qazanda 23 nçe iyün’dä uzaçaq. Datalar “cirle üzidarä organnarı täq’dimnären isäpkä alıp“ bilgelängän.
Tatarstanda söt citeşterü ike ayda 9%qa arttı
Tatarstanda ike ayda 283 meñ tonna söt citeşterelgän. Bu uzğan yılğa qarağanda 23 meñ tonnağa, yäğ’ni 9%qa kübräk. İñ küp söt citeşterüçe rayonnar - Minzälä, Älki, Kukmara häm Baltaç rayonnarı.
Monan tış respublikada ike ayda 66 meñ tonna it citeşterelgän.
29 nçı martta 12 nçe Respublikaküläm iftar uzaçaq
29 nçı martta “QazanÊkspo” xalıqara kürgäzmä zalında 12 nçe Respublikaküläm iftar uzaçaq. Bıyıl iftar comğa köngä turı kilä. Volontyerlarğa, qatnaşuçılarğa comğa wäğaze şunda uqılaçaq. İftarda 12 meñ keşe qatnaşır dip kötelä. Çarada qatnaşuçılarnı awız açu programması kergänçe bay mädäni programma kötäçäk. Programma Rusiyädä iğ’lan itelgän Ğailä yılın, şulay uq Tatarstan möftiyäte tarafınnan iğ’lan itelgän Ğailä häm xäläl yäşäw räweşe yılın isäpkä alıp tözelgän. İftar uza torğan mäydançıqta ğailä qıymmätläre, äxlaq-tärbiyä, patriotlıq temasına wäğaz’lär yañğırayaçaq, Fäläsltin xalqı öçen doğalar uqılaçaq. Respublikaküläm iftarda qatnaşuçılar, 18 säğat’ 17 minutta axşam namazı waqıtı kerü belän Tatarstan möftiye Kamil xäzrät Sämiğullin citäkçelegendä cämäğat’ belän namaz uqıyaçaq häm iftar zalına uzaçaq.
“Näwrüz” xalıqara forumında qatnaşu öçen ğarizalar qabul itelä
Tatarstan başqalasında 27 nçe maydan 1 nçe iyün’gä qadär “Näwrüz” VIII Xalıqara teatr-belem birü forumı uzaçaq. Bıyıl ike yaña sekśiya östäläçäk:”Muzıkal’ teatr” häm “Teatr muzeyı häm arxivı: problemalar häm üseş yünäleşläre”.
Forum qunaqları aktyerlıq ostalığı, säxnä söyläme, plastika, rejissura, kurçaq teatında aktyerlıq häm rejissyerlıq sänğate, sśenografiya, menedjment, teatral’ tänqıyt’ buyınça master-klasslarda qatnaşaçaq.
Däreslär onlayn häm oflayn formatta oyıştırılaçaq.
Qatnaşuçılarğa “Näwrüz” forumı qısalarında kürsätelä torğan spektakl’lärgä buşlay kerü mömkinlege bireläçäk. Törek teatrları, Keçe teatr häm Kamal isemendäge teatr artistlarınıñ çığışları kötelä. Qatnaşu öçen ğarizanı sıltama buyınça 15 nçe aprel’gä qadär qaldıru zarur.
Tatar yazuçısı Ayaz Ğıylacevneñ “Beraw” poveste Änkarada dönya kürde
13 nçe mart könne Tatarstan Yazuçılılar berlege qarşındağı Ädäbi tärcemä üzägeneñ êşçänlege qısalarında Törkiyäneñ Änkaradağı abruylı “Häcä” näşriyatında klassik tatar yazuçısı Ayaz Ğıylacevneñ 1959 nçı yılda icat itkän “Beraw” poveste dön’ya kürde. Anı Fatix Kutlu tärcemä itte. 65 yıldan soñ törek telendä näşir itelgän äsär ädipneñ wafat bulğan könenä turı kilep çığuı xikmätle bulğan. Kutlu älege xezmäten Ayaz Ğıylacevneñ 1880 nçe yıllarda Törkiyägä hicrät qılğan, iseme familiyäsendä mäñgeläşkän qart babası, märxüm Ğıyläcetdin mullağa bağışlap çığarğan. Äsär törek telendä “Täk” dip atala.
Tapşıruda Tatarstan Räiseneñ matbuğat xezmäte, “Tatar-inform” xäbär agentlığı yazmaları qullanıldı.
