Baş qawığı probleması

Qawıq – baş tireseneñ öske qatlamında bulğan üle küzänäk öleşläreneñ kilep töşüe probleması. Qawıq – häm xatın-qızlarnıñ, häm dä irlärneñ çäçlärendä kürenä torğan tire probleması.

Şuşı ısullar baş qawığınıñ yuq buluına yärdäm itä:

• Çäçlärne daimi räweştä yuarğa,
• Çäçlärne daimi tararğa,
• Çäçlärne daimi qararğa, tärbiyälärgä,
• Ozın çäçle keşelärgä çäçlären yış cıymasqa kiräk,
• Stressne azaytırğa kiräk,
• Bik qaynar su belän yuınmasqa,
• Bik salqın su belän dä yuınmasqa,
• Çäçlärne bik yış buyamasqa,
• Gel’, çäç spreyı, muss kebek çäçne qaraw êşlänmälären qullanunı kimetergä,
• Qoyaş nurlarınnan faydalanırğa,
• B vitaminı östämäsen alırğa,
• Śink vitaminı östämäsen alırğa,
• Baş qawığına yaraşlı şampun’ qullanırğa.

KİÑÄŞLÄREBEZ:

Baş qawığına qarşı tabiğıy êfir mayların qullanırğa bula: çäy ağaçı mayı, kokos mayı häm zäytün mayı.

• Aloê vera:

Aloê vera, qorı baş tiresen yomşatıp, qawıq problemasın beterä. Aloê veranı duş aldınnan çäçläregezgä massaj yasap sörtegez. Massajdan soñ 10 minut kötärgä häm annan soñ yuığız. Monı baş qawığı probleması tulısınça betkänçegä çaqlı başqarırğa bula. Fäqät şuşı waqıt êçendä dımlandıruçı üzençäleklärgä iyä şampun’ qullanırğa kiräk.

• Kokos mayı

Bu may bakteriya üterüçe üzençälege häm tireneñ dımın arttıruı belän baş qawığı häm êkzema simptomnarınıñ azaytıluına yärdäm itä ala.

• Çäy ağaçı mayı:

Çäy ağaçı mayı bakteriya üterüçe häm yalqınsınunı beterüçe kebek baş qawığı simptomnarınıñ azaytıluın täêmin itüçe üzençäleklärgä iyä. Fäqät sizger tireneñ qızaruına säbäp bulırğa mömkin. Şuña kürä qullanır aldınnan kokos mayı kebek maylar belän sıyıqlatırğa kiräk.

• Lävän, lavanda mayı:

Lavanda, lävän mayı, çäç tireseneñ qısqa töşerelep, tağın da şoma häm sälamät buluın täêmin itä. Lavanda-lävän mayı mindal’ mayı kebek taşuçı maylar belän quşılğan çaqta baş qawığı problemasınnan qotılırğa yärdäm itä.

• Zäytün mayı:

Baş tiregezgä beraz zäytün mayı salığız. Annan soñ qaynar su belän yüeşlätelgän häm sığılğan qaynar sölge belän başığıznı urap alığız. Soñınnan 40 minut kötegez häm här atna qabatlağız.

      Limon suı:

Maylı häm qawıqlı çäçlärdän qotılu öçen limon suı täêsirle bula. Bu ısul çäçlärneñ pH däräcäsen tigezliy, ber ük waqıtta baş tiresendäge mikozlarnıñ üsüen totqarlıy. Duş alır aldınnan 20 minut çäçegezne limon suı belän yüeşlätegez häm kötep torığız.

     Qıçıtqan:

 Qıçıtqannı qorıtılğan yäki yaña ölgergän kileş qullana alasız. Ber desert qaşığı qıçıtqannı (yaqınça dürt-biş gramm) 750 millilitr qaynap torğan suda östen yabıp dürt minut tübän êsselektä qaynatığız. Suınğannan soñ sözegez. Ägär çäçläregez çista bulsa, qıçıtqan suı belän yuığız. Yartı säğättän soñ barı tik su belän genä yuıp qorıtığız. Ägär çäçläregez pıçraq bulsa, başta şampun’ yäki sabın belän yuığız. Annan soñ sez äzerläp quyğan qıçıtqan suın çäçläregezdä yartı säğät kötteregez häm barı tik su belän genä yuıp qorıtığız. Şuşı ısul çäçläregezgä canlılıq häm balqıp toruçanlıq östi häm ber ük waqıtta baş qawığın da totqarlıy.

     Probiotik alunı arttırırğa:

 Probiotiklarnıñ immunitet sistemasın küätländerep, baş qawığın azaytuı farazlana.

    Omega-3 alunı arttırırğa:

Omega-3 may kislotalarındağı köteklek baş qawığına säbäp bula ala. Losos’, forel’ häm skumbriya kebek maylı balıqlar mökämmäl omega-3 may kislotası çığanağı. Ayıruça balıq mayı östämäsen alırğa bula yäki citen orlığı, çia orlığı häm çikläwek kebek omega-3 cähätennän bay bulğan başqa rizıqlarnı arttırırğa bula.

   A vitaminı belän bay tuqlanu: 

 A vitaminı bulğan kişer, örek, bawır, petruşka, bäränge, mangol’d häm balıqtan torğan bay aş tabınnarı keşene baş qawığınnan qotqara häm sälamät tuqlanuğa da faydalı.

    Alma sirkäse (uksusı):

 Alma sirkäseneñ (uksusınıñ) pH qıymmäte çäç tiresenä ahäñle häm bakteriyane üterä. 1 stakan suğa 1 aş qaşığı quşılğan tabiğıy (organik) alma sirkäse (uksusı) belän çäç tamırlarına massaj yasala. Yaqınça 20 minut kötärgä häm yuınır aldınnan cılı su belän yuıp alırğa. Atnada 3 tapqır yasala. Bu ısul çäçlärneñ yaltırap toruçanlığına da yärdäm itä.

Avtor: tabib Mäxmät Uçar