5G oçuçılarğa komaçawlıy

Dön’yadağı iñ zur oçqıç citeşterüçelär - Boeing häm Airbus şirkätläre Amerika Quşma Ştatları xökümätenä 5G texnologiyäseneñ aviaśiyä industriyäsenä zur zarar biräçäge turında kisätü yasadı.  

Boeingnıñ yuğarı idaräçese Dêyv Kalxun belän Airbusnıñ citäkçese Djeffri Knittel’ AQŞ transport ministrı Pit Buttidjigqa 5G telefon xezmäte xaqında imzalı xat cibärde. Anda “5G oçqıçlarnıñ imin räweştä êşläw sälätenä naçar yoğıntı yasıy ala” diyelä. Xatta monıñ belän bäyle tikşerenülärgä möräcäğat’ itelä.

“Ägär Federal’ aviaśiya dairäse 2019nçı yılda moña rizalıq birgän bulsa, xäzergä qadär yaqınça 345 meñ yulçı häm 5 meñ 400 yök oçqıçı totqarlanu, yuldan taypılu yäisä ğamäldän çığarılu belän oçraşaçaq ide” diyelä xatta.

Şirkät citäkçeläre 5G texnologiyäsenä küçüne kiçekterergä çaqıra. “Airbus häm Boeing 5G iniśiativasın añlaw öçen AQŞ aviaśiyä tözeleşendäge başqa qızıqsınuçı yaqlar belän bergä êşçänlek alıp bara” di alar.

Amerika Quşma Ştatlarında telefon şirkätläre 5nçe ğıynvardan başlap 5G texnologiyäsen qullana başlarğa planlaştıra. Monı yaqlawçı törkemnär aviaśiyä tarmağın qurqaqlıq häm çınbarlıqnı bozıp kürsätüdä ğayepli.