"Qayberläre tereläy kümelgän"

“Xamas” Ğazzä sızığınıñ kön’yağındağı Xan-Yunus şähärennän İzrail köçläre çigengännän soñ Nasır xastaxanäse territoriyäsendä tabılğan kümäk qaberleklärdä aşığıç räweştä xalıqara tikşerü uzdırıluın soradı. Xäzergä qadär annan 392 mäyet çığarıldı. Sälamätlek saqlaw törkemnäre İzrail armiyäse ütergän häm xastaxanä yanına kümgän mäyetlärne êzläw êşçänleklären däwam itä.

“BMO häm başqa xalıqara oyışmalardan yuğalğan keşelärne êzläw häm mäyetlärneñ kemneke buluın açıqlaw öçen kriminal’ mediśina belgeçläre häm kiräkle cihazlarnı cibärüen sorıybız” diyelä “Xamas” belderüendä. Älegä qadär tabılğan gäwdälärneñ yartısınnan artığınıñ şäxese açıqlanmawı assızıqlandı. Qayberläre tere kileş kümelgängä oxşağan.

İzrail armiyäse ozaq waqıt qamap totqannan soñ 15nçe fevral’dä Xan-Yunustağı Nasır xastaxanäsenä basqın oyıştırdı. 24nçe martta qabat höcüm ittelär. Anda xastaxanägä sıyınğan bik küp fälästinle häm mediśina xezmätkärlären qulğa aldılar.

İzrail armiyäse 4 aylıq basıp alu prośessınnan soñ 7nçe aprel’dä Xan-Yunustan çigende. Alar kitkännän soñ qalada kümäk qaberleklär tabıla, cimereklär astınnan häm yul qırıylarınnan mäyetlär cıyıla başladı.