"Xusilär" İzrail korabın "bärgän"

Yämändä idaräne üz qulında totuçı “Xusilär” Aden qultığında İzrail korabın utqa totuların belderde. Alarnıñ xärbi süzçese Yax’ya Seri ber telekanalğa interv’yusında bu xaqta citkerde. Anıñ äytüençä, İzrailneñ “Darwin” korabın raketalar häm keşesez hawa apparatları belän bärälär. Yax’ya Seri maqsatlarına ireşülären belderde.

Süzçe, şulay uq, İzrailneñ kön’yağındağı yar buyı şähäre Êylatqa da raketa höcüme oyıştıruların äytte.

“Xusi” köçläre Qızıl diñgez, Oman diñgeze häm Hind okeanında İzrail häm älege däwlät belän bäyläneşle buluçılarnıñ korabların kirtälärgä tırışa. Monı Fälästin xalqına teläktäşlek maqsatınnan êşläwlären belderälär. “Xusilär” älege höcümnären İzrailneñ agressiyäse tuqtağançı häm Ğazzä sızığındağı qamaw beterelgänçe däwam itäçäklären citkerä. Bik küp şirkät, näticädä, Qızıl diñgez aşa säfärlären tuqtatu qararı çığardı.