Çirkäwdäge ütereş qorbannarına - 88 million dollar
AQŞta 2015nçe yılda bulğan rasaçıl höcüm qorbannarına tülänäçäk summa täğayenlände
Amerika Quşma Ştatlarında 2015nçe yılda afroamerikalılarnıñ çirkäwenä rasaçıl höcüm belän bäyle däğ’wa yomğaqlandı. Anda 9 keşe hälaq bulğan ide. AQŞ yustiśiyä ministrlığı waqıyğada ülüçelärneñ yaqınnarına häm isän-saw qotıluçılarğa tulayım 88 million dollar tülänäçägen belderde.
İsegezgä töşeräbez, 2015nçe yılnıñ 17 iyünendä Kön’yaq Karolinada 200 yıllıq çirkäwgä Dilan Ruf isemle beräw höcüm yasadı. Aq ıruğçı buluı açıqlanğan älege keşeneñ maqsatı afroamerikalılarnı üterü bula. 21 yäş’lek Ruf ülem cäzasına xökem itelde.
Älege qanlı waqıyğada ğomere özelüçelärneñ yaqınnarı häm isän qaluçılarğa tülänäçäk kompensaśiya suması 6 yıldan soñ täğayenlände.
AQŞ yustiśiyä ministrlığı ülüçelärneñ yaqınnarına 6dan başlap 7 yarım million dollarğa qadär, isän qaluçılarğa isä 5 million dollar bireläçägen belderde.
