Gruziyädä matäm iğ'lan itelde

Gruziyäneñ Batumi şähärendä kiçä 7 qatlı binanıñ işelüe näticäsendä 6 keşeneñ ğomere özelüe säbäple ildä 11nçe oktyabr’ milli matäm köne iğ’lan itelde.

Waqıyğa urınında barğan êzläw-qotqaru êşçänlege waqıtında 5 keşeneñ üle gäwdäse tabıldı, şularnıñ 2se bala. Tönlä yaralı kileş cimereklär astınnan çığarılğan ber xatın-qız isä bügen irtän xastaxanädä can birde. 4 keşene qotqardılar.

Waqıyğa urınında yaqınça 300 keşelek törkem êşli. Cimereklär astında äle keşelär barlığı uylanıla.

Faciğaneñ berençe qatta yäşäwçe keşeneñ üz fatirında remont yasap qanunsız üzgäreşlär kertüe arqasında kilep çığuı farazlana. Ul häm 2 êşçe saq astına alındı.

Xökümät räise İrakli Garibaşvili Batumida bulğan faciğa nisbätennän 11nçe oktyabr’ne milli matäm köne i’lan itüen belderde.