İran äfğannarnı kertmäyäçäk

İran Äfğanstan möhacirlärneñ ilgä kerüenä kirtä quyaçaq. Bu xaqta ilneñ êçke êşlär ministrlığınıñ çik buyı êşläre ğomum mödire Xösäyen Kasimi belderde. Anıñ äytüençä, Äfğanstanda Talibannıñ il idaräsen kontrol’gä aluınnan soñğı waqıyğalarnı iğ’tibarğa alıp koronavirus kizüeneñ taraluın buldırmaw maqsatınnan ike il arasındağı çiktä citdi çikläwlär kerteläçäk.

Kasımi bu qısalarda Kön’yaq Xorasan, Sistan-Beluçistan häm Räzävi Xorasan töbäklärendäge iminlek köçlärenä İranğa kerergä teläwçe äfğannarğa irek quymaw kürsätmäse birelüen belderde.

Äfğanstannıñ kürşese İran yaqınça 3 million äfğanlını sıyındırdı. Şularnıñ 800 meñe genä terkälgän.

Bilgele bulğança, Taliban xakimiyätne qulğa töşergännän soñ küp kenä äfğanstanlı ildän qaça başladı.