Balalarınnan ayırılğan ğailälär AQŞta qala alaçaq

Amerika Quşma Ştatları êçke iminlek ministrı Alexandro Mayorkas êlekke İlbaşı Donal’d Tramp çorında çik buyında balalarınnan ayırılğan möhacir ğailäläreneñ AQŞta berläşterelüenä häm ildä qalularına röxsät biräçäklären belderde.

Mayorkas Aq Yortta oyıştırğan matbuğat oçraşuında Tramp çorındağı immigrant säyäsäten "räximsez" bularaq bäyäläde.

Bigräk tä Meksika çigen uzğan çaqta ğailälärennän mäcbüri ayırılğan balalar mäs’äläsendä êşläwlären belderüçe Mayorkas: "Bez çik buyın uzğan çaqta ayırılğan qanunsız möhacir ğailälären berläştererbez, dip ışanabız. Alarğa saylaw mömkinlegen birergä telibez. Bez ber-bersennän ayırılğan ğailälärneñ qanuni räweştä AQŞta qalularınıñ yulların êzlibez”, - dip äytte.

Mayorkas Djo Bayden citäkçelegeneñ ğailälärneñ berläşüe öçen tözegän wazıyfa köçeneñ bügengä qadär 105 ğailäne berläşterüen assızıqladı.