Xan-Yunusta yaña mäyetlär tabıldı

İzrail armiyäseneñ Ğazzä sızığınıñ kön’yağındağı Xan-Yunus şähärennän çigenüennän soñ biredäge “Nasır xastaxanäse” kompeksında tabılğan kümäk qaberlektän tağın 51 mäyet çığarıldı.

Ğazzädäge xökümätneñ matbuğat xezmäte citäkçese İsmail äs-Sävabitä kümäk qaberlektä däwam itüçe êşçänlek turında citkerde. Anda qazu êşläre 20nçe aprel’dän birle bara. Tabılğan mäyet sanı 334kä citte.

İsmail äs-Sävabitä keşe xoquqları oyışmalarına möräcäğat’ itep, İzrailne keşelekkä qarata êşlägän cinayät’läre öçen xökemgä tartırğa çaqırdı.

Awrupa Berlege Ğazzädä tabılğan kümäk qaberlek belän bäyle xäbärlärneñ borçu tudıruçı buluın, älege mäydannarda külämle häm bäysez tikşerü ütkärergä kiräklegen belderde.

BMO süzçese urınbasarı Färxan Xaq ta älege mäs’älädä bäysez häm ışanıçlı tikşerü sorawların citkerde. Anı kem başqaraçağın äytmäsä dä, cirlektä Bötendön’ya sälamätlek saqlaw, Xalıqara Qızıl xac komitetı häm BMO gumanitar êşlär koordinaśiyäse ofisınıñ barlığın söyläde.