Эрдоган: «Газа биринчи кезекте Палестина элинин жери, Америка муну кабыл алышы керек»

Президент Режеп Таййип Эрдоган: «Газа биринчи кезекте Палестина элинин жери, Америка муну кабыл алышы керек»,-деди.

Эрдоган Ислам Кызматташтык Уюму (ИКУ) менен Араб Лигасынын кезексиз биргелешкен саммити өткөн Сауд Арабиядан кайтып келе жаткан учакта журналисттердин суроолоруна жооп берди.

«Маркум мусулман болгондон кийин Бириккен Улуттар Уюму жана башка эл аралык уюмдар иштебей, сокур болооруна дагы бир жолу күбө болдук»,-деп айткан Президент: «Экинчи дүйнөлүк согуштан кийин түзүлгөн структураны жаңылоо азыр абдан маанилүү. Бириккен Улуттар Уюмуна туруктуу мүчөлүк жана анын вето коюу системасы өзгөртүлүшү керек. Дүйнөнүн келечегин жана элдердин жашоолорун вето укугу бар (БУУнун Коопсуздук Кеңеши) 5 өлкөнүн ырайымына калтырууга болбойт»,-деп айтты.

Эрдоган Газа Палестина элинин жери жана Америка Кошмо Штаттары (АКШ) муну кабыл алышы керектигин айтты.

Президент Эрдоган: «Эгер Байден «Газа Палестина элинин жери эмес, бул баскынчы отурукташуучулардын жери, Израилдин жери» деген мамилеге ээ болсо, анда биздин (АКШ президенти Жо) Байден менен келишимге жетишибиз мүмкүн эмес»,-деди.

Эрдоган, ИКУ жана Араб Лигасынын кезексиз биргелешкен саммитинен кийин жарыяланган биргелешкен декларацияга байланыштуу, «Мынчалык көп иш-аракет пункттары менен мурда эч качан айтылган эмес, отурукташкандарды террорист катары сүрөттөгөн бир текст да бар»,-деп айтты.

Эрдоган сөзүн мындайча улантты: «Алар ХАМАСты террордук уюм деп айткылары келет. Жок, ал террордук уюм эмес. Алар өз жерин коргоо үчүн күрөшкөн, мекени үчүн согушкан адамдар».

Эл аралык коомчулуктун эми Газадагы кыргындарга каршы чара көрүшү керектигин белгилеген Президент, Бириккен Улуттар Уюмунун Коопсуздук Кеңешинин бул темада дагы бир жолу иштебей калганын айтты.

Эрдоган ошондой эле маселени чечүү үчүн эң ылайыктуу сунуштарды берген өлкөнүн Түркия экенин айтты.

Президент Эрдоган: «Бул чөлкөмдө Түркияга карабастан демилге көтөрүү же план түзүү мүмкүн эмес. Биздин позициябыз, мамилебиз, баалуулуктарыбыз жана принциптерибиз ачык. Түркия аймактагы кризистерди жана көйгөйлөрдү чечүүчү негизги өлкө. Чөлкөмүбүздөгү бардык өлкөлөр менен жолугуп, кагылышкан жана согушуп жаткан тараптарды бир үстөлгө чогулта алган жалгыз өлкө-Түркия»,- деди.

Израилдин Газадагы акыркы кол салуулары менен эл аралык коомчулуктун колдоосунан ажыраганын белгилеген Эрдоган:«Өлкөлөрдүн өкмөттөрү өздөрүнүн империалисттик таламдарына ылайык Израилдин өкмөтү менен кучакташуу үчүн жарышып жатса дагы, азыр Израиль коомдун көз алдында наристени өлтүрүүчү канкор өлкө болуп калды»,-деп айтты.