Түркияда баскычтуу түрдө калыбына келтирүү жол-жобосу жарыяланды

Коронавирустун жаңы түрүнө (Ковид-19) каршы күрөштө Түркия акырындап калыбына келүү мезгилинин үчүнчү этабына 1-июлда киришүүдө.

Ички иштер министрлиги акырындык менен калыбына келтирүүнүн үчүнчү фазасына байланыштуу циркуляр чыгарды, циркуляр 81 провинциянын губернаторлугуна жөнөтүлдү.

Буга ылайык, коменданттык саат жана шаарлар аралык саякаттоо чектөөлөрү 1-июлдан тарта токтотулат.

Циркулярга ылайык, иш-чаралардын алкагында ишин токтоткон бардык жумуш орундары жана кинотеатрлар 1-июлдан тарта кайрадан иштей баштайт.

1-июлдан тарта бардык жумушчу орундар лицензиядагы ишмердүүлүккө ылайык аныкталган иштөө-жабуу сааттарынын ортосунда кызмат көрсөтө алышат.

Коронавируска каршы күрөшүүнүн алкагында, тазалык, маска жана аралыкты сактоо эрежелери сакталган шартта, конок жайгашуучу жайларындагы чектөөлөр жана чаралар токтотулат.

Тамактануучу жайлардын ички жана сырткы аймактарында бир эле учурда боло турган адамдардын саны чектелбейт.

Үйлөнүү үлпөтүндө жана үйлөнүү тоюнда катышуучулардын жабык жерлерге берилген чеги колдонулбайт, тамак-аш жана суусундуктар берилиши мүмкүн.

Концерттер, фестивалдар, жаштар лагерлери сыяктуу иш-чараларга белгиленген принциптер сакталган шартта уруксат берилет.

Бангладеш, Бразилия, Түштүк Африка, Индия, Непал жана Шри-Ланкадан Түркияга келген адамдар жана акыркы 14 күндө бул өлкөлөрдө жүргөн адамдар үчүн милдеттүү карантиндик арыз алынып салынууда. Бул адамдар Түркияга кирүүдөн кеминде 72 саат мурун жасалган терс ПЦР тестинин отчетун тапшырышы жетиштүү болот.

Ооганстандан жана Пакистандан Түркияга келген жана акыркы 14 күндө бул өлкөлөрдө жүргөн адамдар үчүн милдеттүү карантиндин мөөнөтү 10 күнгө чейин кыскарат. Эгерде карантиндин 7-күнү колдонулган ПЦР анализинин жыйынтыгы терс болсо, милдеттүү түрдө карантинди колдонуу токтотулат. Эгерде ПЦР анализи оң натыйжа берсе, Саламаттыкты сактоо министрлиги Ковид-19 колдонмосуна ылайык иш алып барат.