Казакстандагы токой өртүндө каза болгондор үчүн Улуттук аза күтүү күнү жарыяланды

Бүгүн Казакстандын Абай облусундагы токой өрттөн каза болгон 14 токой кызматкери үчүн «Улуттук аза күтүү күнү» жарыяланды.

Улуттук аза күтүү күнүнө байланыштуу өлкөдөгү бардык желектер жарым-жартылай түшүрүлүп, теле жана радиолордогу оюн-зоок жана музыкалык берүүлөр эфирден өчүрүлүп, расмий мамлекеттик органдардын жана маалымат сайттарынын беттери ак-карага жабылды. Казакстандын президенти Касым Жомарт Токаев өрт уланган Абай облусунда түзүлгөн чукул штабда бийлик өкүлдөрү менен жыйын өткөрдү.

Токаев жыйында тийиштүү министрлик менен облустук акимчилик кырсыктын алдын алуу боюнча жетиштүү деңгээлде иш алып бара албай жатканын белгиледи.

Башкы прокуратура өрт боюнча иликтөө иштери башталганын билдирди. Атайын тажрыйбалуу прокурорлор дайындалган тергөө иштеринин алкагында өрт боюнча жооптуу мекеме жана органдардын иш-аракеттерине юридикалык баа берүү максатында шалаакылык боюнча иш козголду.

Өрт уланган 3 жерде өчүрүү иштери уланып жатканда, облустагы өрттүн кесепетинен катуу түтүндүн таасири астында калган кээ бир айылдар эвакуацияланганын губернаторлук билдирди.

Казакстандын өзгөчө кырдаалдар министри Сырым Шарипханов журналисттерге кырдаал көзөмөлдө экенин, бирок абанын температурасынын жогорулашынан жана катуу шамалдан улам аймакта кайра тутануу коркунучу бар экенин билдирди.

Шарипханов аймактагы өрттү өчүрүүгө адам жана техника жетиштүү экенин билдирди.

Өрттүн эффективдүү болгон аймагы барган сайын кичирейип жатканын белгилеген Шарипханов: «Биздин эсептөөлөр боюнча өрттү жакынкы күндөрдө өчүрөбүз»,-деди.

8-июнь күнү Абай облусунун Семей токоюнда өрт чыгып, өрткө биринчи чара көрүшкөн делген 14 токой кызматкери каза болгон.