Түркмөнстандагы Дервезе газ кратеринде күйүп жаткан өрт өчүрүлөт

Түркмөнстандын президенти Гурбангулы Бердымухамедов Дервезе газ кратеринде 1971-жылдан бери күйүп жаткан өрттү өчүрүү иштерин баштоону тапшырды.

Бердымухамедов Министрлер кеңешинин жыйынында сүйлөгөн сөзүндө Дервезе аймагында көп жылдардан бери чоң көлөмдө газ күйүп жатканын жана бул абалдын айлана-чөйрөгө да, айланасында жашаган элдин ден-соолугуна да терс таасирин тийгизгенин айтты.

Бердымухамедов Дервезеде өлкөгө олуттуу киреше алып келе турган бир ресурстун текке кеткенин белгилеп, өкмөткө илимпоздорду чогултуп, керек болсо чет элдик адистердин колдоосу менен өрттү өчүрүүнүн жолдорун издөөнү тапшырды.

Мурдагы союз учурунда геологдор иштеп жатканда кокусунан пайда болгон кратердин оту 1971-жылдан бери уланып келет.

Тозок дарбазасы деп да аталган кратер туристтердин көңүлүн бурат.