Нигерия өкмөтү чет элдик жумушчуларды иштеткен уюмдарга жана жетекчилерге милдеттүү салык киргизди

Нигерия өкмөтү чет элдик жумушчуларды иштеткен уюмдарга жана жетекчилерге жыл сайын милдеттүү салык киргизди.

Жергиликтүү басма сөздө орун алган кабарга караганда, Нигерия өкмөтү чет элдик кызматкерлерди жетекчи кызматтарда иштеткен мекемелерге 15 миң доллар, башка чет элдик жумушчулар үчүн 10 миң долларлык жылдык милдеттүү салыкты киргизди.

Дипломатиялык миссиянын кызматкерлери жана мамлекеттик кызматкерлер бул ишке ашыруудан бошотулат.

Президент Бола Ахмед Тинубу, нигериялыктар менен чет элдик жумушчулардын ортосундагы жумуш мүмкүнчүлүктөрүн тең салмактоо үчүн жылдык милдеттүү салыкты киргизгендерин айтты.

Өкмөт кирешени жана жумушта жергиликтүү калктын санын көбөйтүүнү максат кылып жатканын билдирген Тинубу: «Максат - өлкөдө чет өлкөлүк компанияларда квалификациялуу нигериялыктар үчүн жумушка орношуу мүмкүнчүлүктөрүн жогорулатуу менен бирге, чет өлкөлүктөр менен нигериялык жумушчу күчүнүн ортосундагы эмгек акы айырмачылыктарды жоюу»,-деп айтты.

Жылдык милдеттүү салыкты бузган жеке жактарга жана уюмдарга айып пул салынып, 5 жылга чейин эркинен ажыратылат. Салык жылына кеминде 183 күн жумушчу иштеткен компанияларга салынат.

Нигериянын иммиграция кызматы салыктын аткарылышы үчүн жооптуу болот.

Жергиликтүү басма сөздүн Нигериянын ички иштер министрлигине таянуу менен берген маалыматтарына караганда, өлкөдө 150 миңден ашык чет өлкөлүк жумушчу бар. Чет элдик жумушчулардын басымдуу бөлүгү мунай-газ, курулуш, телекоммуникация жана тейлөө тармактарында иштешет.