Израиль «согуш абалын» жарыялады
Израилдин премьер-министринин басма сөз кызматы тарабынан жасалган билдирүүгө караганда, премьер-министр Беньямин Нетаньяху коопсуздук жыйынын өткөрдү.
Израилде блокададагы Газа тилкесинен башталган чабуулдардан кийин согуш абалы жарыяланды.
Израилдин премьер-министринин басма сөз кызматы тарабынан жасалган билдирүүгө караганда, премьер-министр Беньямин Нетаньяху, коргоо министри Йоав Галлант, башкы штабдын төрагасы Герзи Халеви жана башка жогорку даражалуу чалгындоо жана коопсуздук кызматкерлери коопсуздук жыйынын өткөрүштү.
Сессиядан кийин өлкөдө «согуш абалы» жарыяланып, ири согуштук аракеттер жактырылды.
Премьер-министрликтин билдирүүсүндө да : «Газа тилкесинен жасалган кандуу террордук кол салуу Израилди согушка мажбурлады жана согуш 2023-жылдын 7-октябрында таңкы саат 06:00дө башталды»,-деп айтылды.
Хамастын аскерий канаты Кассам бригадасы кечээ эртең менен Израилге каршы «Акса топону» деп аталган кеңири чабуулун баштаганын жарыялады. Газадан Израилди көздөй миңдеген ракеталар атылганда, куралдуу топтор аймактагы отурукташуу жерлерине киришкен.
Израиль армиясы да ондогон согуштук учактары менен Газа тилкесине чабуул баштаган.
