Перудагы бороон-чапкын тууралуу эскертүү

Перунун президенти Дина Болуарте тропикалык «Яку» бороонунан улам келип чыгышы мүмкүн болгон климаттык окуялар менен күрөшүү үчүн борбор шаар Лимада кызыл эскертүү жарыялагандарын айтты.

Болуарте кызгылт-сары денгээлден кызыл эскертүүгө өткөндөрүн белгилеп : «Бороондордон улам нөшөрлөгөн жамгыр күтүлүп жатат, жарандык коргонуу системасы, куралдуу күчтөр жана улуттук полиция кызматкерлери күжүрмөн даярдыкта. Мектептерде жана университеттерде окуу бир күнгө токтотулду»,-деп айтты.

Лимадан өткөн Чиллон, Римак жана Лурин дарыяларынын толуп кетүү коркунучу бар экенин белгилеген Болуарте, аймакта эксперттик издөө-куткаруу тобунун иштей турганын жарыялады.

Жарандардан саякаттарын кийинкиге жылдырууну суранган Болуарте: «Өкмөт туруктуу координациялоонун үч деңгээлин бекитти. Биз жарандардан сабырдуулукту, бирок бороондун таасирине каршы сак болууну суранабыз»,-деди.

Премьер-министр Альберто Отарола да бороондун кыйратуучу таасирине каршы коомчулукту эскертип: «Көрүлгөн чаралар Лима жана Каллао аймагында 24 саат бою жарандардын кызматында болот»,-деп билдирди.

Тынч океанда пайда болгон «Яку» бороонунун өлкөнүн жээктеринде бүгүн түндөн баштап таасирдүү болоору күтүлүүдө.