Харрис: «Орусия Украинада адамзатка каршы кылмыш кылып жатат»

Америка Кошмо Штаттарынын (АКШ) вице-президенти Камала Харрис Орусиянын Украинада адамзатка каршы кылмыш кылганын билдирди.

Харрис Германиядагы 59-Мюнхен коопсуздук конференциясында сүйлөгөн сөзүндө: «АКШ расмий түрдө Орусия (Украинада) адамзатка каршы кылмыш кылганын аныктады»,-деди.

Вашингтондун Орусиянын адамзатка каршы кылмыштарын иликтөөдө Украинага жардам берерин билдирген Харрис, «кылмышкерлердин» жана бул кылмыштарга буйрук бергендердин жоопко тартылаарын баса белгиледи.

Харрис: «Биз баарыбыз бул жерде макул болушубуз керек, белгилүү жана белгисиз курман болгондордун бардыгына адилеттүүлүк иштеши керек»,-деп айтты.

Украинада карапайым калкка каршы кеңири жайылган кылмыштардан Орусиянын жооптуу экенин баса белгилеген Харрис бул кылмыштарды киши өлтүрүү, зордуктоо, кыйноо жана мажбурлап депортациялоо катары санады.

Харрис ошондой эле АКШнын Украинаны зарыл болгонго чейин колдой турганын белгиледи.

Кытайдын Орусия менен болгон карым-катнаштарына токтолгон Харрис Москванын Орусия-Украина согушунан кийин Пекин менен болгон карым-катнаштарын тереңдетүүдөн тынчсыздангандарын айтты.

Кытайды Орусияга курал ташып колдоо көрсөтпөөгө чакырган Харрис, Пекиндин бул багыттагы кандайдыр бир кадамы эл аралык укукка негизделген тартипти дагы да буза турганын баса белгиледи.