Брюссельде ЕО көшбасшылары саммиті өтеді
Екі күнге созылатын Саммитке 27 елдің мемлекет немесе үкімет басшылары қатысады.
Еуроодақ (ЕО) басшылары Бельгияның бас қаласы Брюссельде экономика және бәсекелестікке қоса, Таяу Шығыстағы оқиғаларға қатысты тақырыптарды талқылау үшін бас қосады.
27 елдің мемлекет немесе үкімет басшыларының қатысуымен бүгін басталатын Саммит екі күнге созылады.
«Ерекше» мазмұндағы саммит Еуроодақ басшыларының 6-9 маусым күндері өтетін Еуропарламент (ЕП) сайлауы алдындағы соңғы бас қосу болмақ.
Отырысқа ЕО Кеңесі төрағасы Шарль Мишель басшылық жасайды. Еурокомиссия төрайымы Урсула фон дер Ляйен және Еуроодақ Сыртқы істер және қауіпсіздік саясаты жөніндегі жоғарғы өкіл Жозеп Боррель де Саммитке қатысады.
Түркия уақытымен сағат 20:00 шамасында басталуы күтілетін саммитте көшбасшылар алдымен Еуропа Парламенті төрайымы Роберта Метсоламен бас қосып, пікір алмасады.
