امریکا مدافعه وزیری افغانستان توغریسیده کورفز اولکه لری مقام لری بیلن سوزله شدی

امریکا قوشمه ایالتلری مدافعه وزیری لوید آستین, امریکا نینگ افغانستان دن چیقیشی توغریسیده کویت, بحرین, قطر و بیرلشگن عریب امیرلیک لری مقام لری بیلن صحبت قیلدی.

امریکا قوشمه ایالتلری مدافعه وزیرلیگی (پنتاگون) بیرگن بیاناتیده, آستین نینگ, تلفن آرقه لی, کویت مدافعه وزیری شیخ حمد جابر الصباح, بحرین ولیعهد شهزاده سی سلمان بن حمد الخلیفه, قطر امیری تمیم بن حمد آل ثانی و بیرلشگن عرب امیرلیک لری ولیعهد شهزاده سی محمد بن زاید آل نهیان بیلن سوزلشگن لیگی نی بیلدیردی. 

بیاناتده, اوشبو صحبت لرده ایککی تامانلمه مناسبت لر و همکارلیک لردن تشقری افغانستان ده گی سونگگی وضعیت باره سیده هم سوز یوریتیلگن لیگی معلوم قیلیندی.