«qedir kéchisi» bügün idrak qilinidu
islam dinida ramizanning 27 – kéchisige toghra kélidighan we quran kerimde «(sherep we pezilette) ming aydin artuq» ikenliki bildürülgen «qedir kéchisi» bügün idrak qilinidu.
türkiye awazi radiyosi xewiri: quran kerim nazil qilinishqa bashlanghan «qedir kéchisi», «köklerning ishikliri échilidighan, dua we töwbiler qobul qilinidighan muqeddes kéche» süpitide qobul qilinidu.
«kowid – 19» yuqumi tedbirliri dairiside jamelerde ammiwi ibadet we paaliyetler cheklengenliki üchün, «qedir kéchisi», öylerde ibadet we dua arqiliq idrak qilinidu.
türkiye diniy ishlar idarisining bashliqi eli erbash, «qedir kéchisi» munasiwiti bilen élan qilghan bayanatida, mundaq dédi: «bu kéche, semimiy töwbilirimiz arqiliq rebbimizge yüzlinip, gheplet ichide ötküzgen künlirimiz üchün allah taaladin istighpar telep qilayli, bu pursetni gheniymet bilip, qulchiliq we taet – ibadetke sel qarighan nuqsanlirimiz üchün rebbimizdin kechürüm sorayli.»
u, israiliyening tünügün kechte mesjidi eqsadiki hujumliri toghriliqmu toxtilip mundaq dédi: «mesilini hel qilishning birdinbir charisi, pütkül musulmanlarning bir yerge jem bolup, eng küchlük shekilde quddusqa sahib chiqishi, zulum - sitem we ishghalning aldini élishidur. chünki, mesjidi eqsagha hujum qilghan zalimlar, islam ümmitining chéchilangghuluqidin jasaret almaqta.»
