adana kawipi

türkiye awazi radiyosi: ottura sherq jughrapiyeside dastixanlarda zadi kem bolsa bolmaydighan taamlardin biri kawaptur. ereb tilida «pishqan», «qizarghan» dégen menini bildüridighan kawap, lughet menisi jehettin biwasite otta yaki qapning ichide susiz pishurulidighan taamlargha bérilidighan omumiy isimdur. sherq we ottura sherq elliride keng istémal qilinidighan kawaplar, türk ashxanilirida özige xas halgha keltürülgen. türkiyede hemme wilayetning özige xas kawipi bar bolsimu, lékin eng meshhur bolghanliri jenubiy we sherqiy jenubiy wilayetlerde közge chéliqidu. dölet miqyasida adette «kawapchi» dep atilidighan kawapxanilarda yéyilidighan kawaplar shu wilayetning nami bilen atilidu. bularning ichide eng meshhur bolghini «adana kawipi» dur. türkiyening jenubiy rayonigha jaylashqan we dölet boyiche 6 – chong wilayet hésablinidighan adanagha xas bu kawapni hemme kawapxanilardin tapqiili bolidu.    

 bügünki pirogrammimizda,  meshhur «adana kawipi» pishurush usuli heqqide melumat bérimiz.

«adana kawipi» pishurush üchün kéreklik bolghan matériyallar töwendikiche:

• 350 giram kala göshi qiymisi
• 300 giram paqlan göshi qiymisi
• bir chish samsaq
• ikki dane quruq piyaz
• bir chay qoshuqi qizilmuch
• bir chay qoshuqi qarimuch
• bir qoshuq qizilmuch qiyami
• 1 – 2  baghlam yumghaqsüt

«adana kawipi» pishurush usuli töwendikiche:

• piyazlarni chasa qilip toghrang.
• süyini süzüp, bir qachigha qoyung.
• samsaqlarni ézip, piyazlar bilen arilashturung.
• paqlan göshi qiymisi bilen kala göshi qiymisini arilashturup, piyaz we samsaq arilashmisi bilen yoghurung.
• qizilmuch, qarimuch  we qizilmuch qiyamini arilashmigha yégüzüng.
• su yéghini ilawe qiling.
• yumghuqsütni inchike toghrighandin kéyin, arilashmigha ilawe qiling.
• andin matériyalni tonglatquda 2 – 3 – saettek dem yatquzung.
• doxupkining kawap zixini qassaptin élinghan quyruq yéghi bilen yaghlang, yoq bolsa sériq may bilen yaghlisingizmu bolidu.
• doxupkini 200 giradus otta qiziting.
• göshlük arilashmini zixtin ötküzüng.
• zixlarni doxupkining kawap zixning üstige tizip, texminen 20 – 25 minut pishurghandin kéyin, istémal qilsingiz bolidu.