yaponiyening tarixiy qelesige ot ketti
yaponiyening okinawa rayonidiki tarixiy shuri qelesi köyüp külge aylandi.
türkiye awazi radiyosi xewiri: kiyodo agéntliqining munasiwetlik xewiride, birleshken döletler teshkilati/ maarip, ilim – pen we medeniyet teshkilati «UNESCO» ning dunya mirasi tizimlikidin orun alghan shuri qelesining shu yerning waqti kech saet 02:40 ötkende bashlanghan ot apitide, qoyup ketkenliki bildürüldi.
ot öchürüsh etretliri ot apitide qelening «seyden» déyilidighan ana binasidin bashqa yene «hokuden» déyilidighan shimaliy terep binasi hemde «nanden» déyilidighan jenubiy terep binasiningmu pütünley köyüp külge aylanghanliqini bildürdi.
xewerde, naha shehiridiki qelening yer kölimi texminen 4800 kiwadirat métér bolup, qelege tewe 7 binaning pütünley köyüp ketketliki uqturuldi.
alaqidar mesullar ot apitide adem ölüsh yaki yaridar bolush hadisisi körülgen weyaki körülmigenliki heqqide héchqandaq melumat bermidi. biraq qele etrapida olturushluq 30 din köprek kishining waqitliq bashqa jaygha yötkiwétilgenliki bildürüldi.
ot kétish weqesi qelening ana binasida bashlanghanliqi texmin qilinghan bolsimu, biraq ot kétish sewebi téxiche tekshürülmekte.
yaponiye kabéinti bash katibi yoshixide suga muxbirlargha bergen bayanatida, shuri qelesining okinawagha nisbeten intayin muhim sémwol ikenlikini eskertip, hökümetning qeleni qaytidin yasap chiqish üchün qolidin kélidighanning hemmini qilidighanliqini éytti.
riyukyo padishahliqi dewride, texminen 500 yil ilgiri yasalghan shuri qelesi, ikkinchi dunya urushi mezgilide éghir ziyangha uchrap, qayta rémunt qilinghan we 1992 – yili dölet baghchisi süpitide xelqning ziyaritige échiwitilgen idi.
shuri qelesi 2000 – yilida birleshken döletler teshkilati maarip, ilm – pen we medeniyet teshkilati «UNESCO» ning dunya mirasi tizimlikige kirgüzülgen idi.
